Raportet nga Spanja bëjnë të ditur se Real Madridi ka ndërmend të aktivizojë klauzolën e riblerjes prej 80 milionë eurosh për Nico Paz në verën e vitit 2027, pasi Como të blejë 50 për qind të mbetura të kartonit të tij për 60 milionë euro.
Marrëveshja e ndërlikuar u konfirmua dje nga disa burime në Itali dhe Spanjë, duke i mundësuar talentit argjentinas të vazhdojë zhvillimin e tij nën drejtimin e Cesc Fabregas.
Como e bleu Nico Paz nga akademia e Real Madrid në vitin 2024 për 6 milionë euro.
Megjithatë, klubi spanjoll ruajti të drejtën për të përfituar 50 për qind nga një shitje e ardhshme ose ta riblente lojtarin për 9 milionë euro në vitin 2026 dhe 11 milionë euro në vitin 2027.
Real Madridi nuk e aktivizoi këtë klauzolë, por vetëm e njoftoi Comon këtë javë se kishte ndërmend ta bënte, duke i dhënë klubit italian mundësinë të blinte edhe 50 për qind të mbetura të kartonit për 60 milionë euro.
Kjo e vlerëson reprezentuesin e Argjentinës në një total prej 120 milionë eurosh.
Como e ka pranuar ofertën dhe pritet të nënshkruajë dokumentacionin gjatë ditëve në vijim, ndërsa Real Madrid do të sigurojë një klauzolë të re riblerjeje prej 80 milionë eurosh, e vlefshme vetëm gjatë verës së vitit 2027.
Sipas “Diario AS”, drejtuesit e Real Madrid janë të bindur se do ta ushtrojnë këtë të drejtë dhe do ta rikthejnë Nico Paz në “Bernabéu”.
Deri atëherë, mesfushori do të ketë mundësinë të luajë rregullisht në Serie A dhe në Ligën e Kampionëve, duke fituar më shumë përvojë përpara rikthimit të mundshëm te gjiganti spanjoll.
Duke marrë parasysh shumat e paguara nga Como dhe klauzolat e marrëveshjes, Real Madrid në fund mund ta rikthejë një Nico Paz plotësisht të zhvilluar në vitin 2027 me një kosto neto prej vetëm 14 milionë eurosh.
Kjo sepse klauzola e riblerjes prej 80 milionë eurosh do të kompensohet nga 66 milionë eurot që Como do t’i ketë paguar Real Madridit në periudhën 2024–2026./GazetaExpress/