Shtetet e Bashkuara do të qëndrojnë përkrah aleatëve të tyre evropianë në mbrojtje të shteteve baltike, deklaroi të martën komandanti i forcave tokësore të NATO-s në Evropë, gjenerali Chris Donahue, teksa aleanca vendosi një seli shtesë komande në rajon.
“Jeni të gatshëm të bëni më shumë dhe t’i pasoni fjalët me vepra, dhe Shtetet e Bashkuara do të jenë aty përkrah jush”, tha gjenerali amerikan Donahue gjatë një ceremonie në qytetin estonez Valga.
“Kështu ndërtohet parandalimi: Jo me fjalë nga një podium, por me çizme në baltë”, shtoi ai.
Donahue, i cili do të largohet nga posti i tij të enjten, shërben gjithashtu si komandant i forcave tokësore amerikane në Evropë dhe Afrikë.
Deri tani, trupat e NATO-s në shtetet baltike – Lituani, Letoni dhe Estoni – si dhe në Poloninë veriore, kanë qenë nën komandën e një selie të vetme shumëkombëshe me qendër në qytetin veriperëndimor polak Szczecin.
Krijimi i kësaj zone të dytë komande i mundëson aleancës dislokimin e më shumë trupave në shtetet baltike. Për momentin, dy divizione shumëkombëshe në Estoni dhe Letoni do të operojnë nën komandën e Korpusit Gjermano-Holandez, me bazë në qytetin gjerman të Mynsterit.
NATO ka paralajmëruar se Rusia, e cila pushtoi Ukrainën në vitin 2022, mund të ndërmarrë një sulm në shkallë të gjerë në territorin aleat qysh në vitin 2029, nëse vazhdon të armatoset me ritmet aktuale. Kremlini i mohon këto plane.
Presioni mbi Evropën për të rritur kapacitetet e saj mbrojtëse është shtuar pas kritikave nga ish-presidenti i SHBA-së, Donald Trump, i cili akuzon bllokun se nuk po shfrytëzon potencialin e tij ushtarak.