Vlora Çitaku kritikon shtyrjen e aktgjykimit në Hagë: “Drejtësia e vonuar nuk është drejtësi”
Deputetja e Partisë Demokratike të Kosovës (PDK), Vlora Çitaku, ka shprehur pakënaqësi pas vendimit për të shtyrë sërish datën e shpalljes së aktgjykimit në rastin ndaj ish-krerëve të Ushtrisë Çlirimtare të Kosovës (UÇK) në Dhomat e Specializuara në Hagë. Data e re e caktuar është 16 shtatori 2026.
Përmes një reagimi në rrjetet sociale, Çitaku e ka cilësuar shtyrjen e procesit gjyqësor si të pajustifikueshme, duke theksuar se vonesat e tilla e largojnë procesin nga parimi i drejtësisë.
Ajo citoi drejtpërdrejtë fjalët: “16 shtator 2026, ora 10:00. Edhe dita e shpalljes së aktgjykimit po shtyhet sërish. Këto vonesa të turpshme nuk kanë më asnjë lidhje me drejtësinë. Drejtësia e vonuar nuk është drejtësi.”
Çitaku theksoi më tej se, ndonëse vonesat mund ta shtyjnë dhënien e vendimit, ato nuk kanë fuqinë të ndryshojnë të vërtetën. Ajo e përmbylli këtë pikë me shprehjen: “Vonesat mund ta shtyjnë aktgjykimin, por nuk mund ta ndryshojnë të vërtetën.”
Në vijim, Çitaku ka pohuar besimin e saj në një drejtësi të paanshme dhe jo politike, duke shprehur shpresën se vendimi përfundimtar do të jetë në favor të ish-pjesëtarëve të UÇK-së. Ajo e përfundoi reagimin e saj me një thirrje për drejtësi: “Ne besojmë në drejtësi. Jo në drejtësi politike, por në drejtësi të vërtetë. Drejtësi për çlirimtarët. Drejtësi për historinë. Drejtësi për të ardhmen. Besojmë se, më në fund, do të flasë drejtësia. Për Kosovën. Për UÇK-në.”