Presidenti Begaj në Transit në Kosovë: Policia Paralajmëron Ndërprerje të Përkohshme të Qarkullimit Rrugor
Policia e Kosovës ka njoftuar se me datën 8 korrik 2026, do të zbatohen masa të veçanta sigurie për shkak të kalimit transit nëpër territorin e Kosovës të Presidentit të Republikës së Shqipërisë, z. Bajram Begaj.
Sipas njoftimit zyrtar, Policia ka ndërmarrë paraprakisht të gjitha veprimet operative të nevojshme dhe ka angazhuar njësitë përkatëse policore. Qëllimi është garantimi i sigurisë dhe i rrjedhës së lirë të komunikacionit rrugor përgjatë itinerarit të eskortës presidenciale.
“Me datën 08.07.2026, Policia e Kosovës, me rastin e kalimit transit nëpër Kosovë të Presidentit të Republikës së Shqipërisë z. Bajram Begaj, ka ndërmarrë paraprakisht të gjitha veprimet e nevojshme operative duke angazhuar njësitë përkatëse policore, me qëllim të ofrimit të sigurisë dhe rrjedhës së lirë të komunikacionit rrugor përgjatë rrugëve lëvizëse të eskortës”, theksohet në njoftim.
Për shkak të këtyre masave, Policia ka bërë të ditur se gjatë ditës së sotme do të ketë ndërprerje të përkohshme të qarkullimit rrugor, në intervale të shkurtra kohore, në segmente të caktuara rrugore.
Në kuadër të masave të marra, “për të mundësuar qarkullim të lirë sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore nga Pika e Kalimit Kufitar Vërmicë deri në Pikën e Kalimit Kufitar Dheu i Bardhë dhe anasjelltas, gjatë kthimit po ashtu me të njëjtën datë, ku edhe mund të ketë riorientim të trafikut në rrugë alternative”, thuhet në njoftimin e Policisë.
Në përfundim, Policia e Kosovës ka falënderuar qytetarët dhe të gjithë pjesëmarrësit në qarkullimin rrugor për mirëkuptimin e treguar.