Ish-kryetarja e Komisionit Qendror të Zgjedhjeve, Valdete Daka, e ka konsideruar të paarsyeshme vonesën në proceset politike për formimin e institucioneve të reja në Kosovë.
Daka theksoi se vendi ka humbur kohë të vlefshme për shkak të përsëritjes së proceseve zgjedhore dhe zvarritjes së arritjes së marrëveshjeve politike.
Ajo deklaroi: “Kjo vonesë është krejtësisht e paarsyeshme, pasi Kosova ka humbur gati dy vjet në këto pritje dhe zgjedhje që përsëriten vazhdimisht. Natyrisht, çdo ditë është thelbësore për vendin tonë.”
Daka komentoi gjithashtu afatin e vendosur nga ushtruesja e detyrës së kryetares, Albulena Haxhiu, për dialog mes partive politike, duke theksuar se deri më tani nuk është vënë re asnjë përparim apo afrim i qëndrimeve.
“Megjithëse zonja Haxhiu deklaroi se u ka dhënë kohë partive politike për bisedime, nuk po shohim asnjë dialog apo arritje të ndonjë marrëveshjeje,” u shpreh ajo.
Sipas Dakës, deklaratat e partive politike nuk tregojnë gatishmëri për bashkëpunim. Ajo përmendi veçanërisht qëndrimet e LDK-së dhe PDK-së përballë mundësisë së një marrëveshjeje me Lëvizjen Vetëvendosje.
“Nuk shoh ndonjë arsye pse është dhënë kjo kohë, përveç se Vetëvendosja po fiton kohë,” tha Daka.
Daka vlerësoi se zvarritja e procesit politik po dëmton rëndë funksionimin institucional dhe interesat jetike të vendit.