Kosova dhe Franca thellojnë bashkëpunimin me pesë marrëveshje, Konjufca: Franca, partner kyç
Prishtinë – Kosova dhe Franca kanë firmosur sot pesë marrëveshje të reja, duke thelluar bashkëpunimin dypalësh në fusha të rëndësishme si ekonomia, energjia, arsimi dhe përgatitjet për Lojërat Mesdhetare 2030. Zyrtarët e lartë nga të dy vendet theksuan rëndësinë e këtij partneriteti strategjik.
Pas ceremonisë së nënshkrimit, ministri i Jashtëm në detyrë, Glauk Konjufca, vlerësoi Francën si një nga partnerët më të rëndësishëm të Kosovës që nga shpallja e pavarësisë. Konjufca deklaroi se Franca ka qenë dhe mbetet një shtyllë kyçe për projektin e integrimit evropian të vendit. Ai theksoi përkushtimin e palëkundur të Kosovës ndaj reformave demokratike, sundimit të ligjit dhe përafrimit të politikave të jashtme dhe të sigurisë me Bashkimin Evropian.
“Franca, qysh prej shpalljes së pavarësisë së Kosovës, ka qenë dhe mbetet një partner i rëndësishëm i Republikës së Kosovës dhe shtyllë e projektit për integrimin evropian të vendit tonë”, u shpreh Konjufca. Ai shprehu kënaqësinë për nënshkrimin e këtyre pesë marrëveshjeve, të cilat, sipas tij, ngrenë marrëdhëniet dypalëshe në një dimension krejt të ri. Konjufca gjithashtu shprehu mirënjohjen për mbështetjen e Francës, duke përfshirë edhe ndihmën e gatshme për organizimin e Lojërave Mesdhetare 2030, të cilën e cilësoi si dëshmi të angazhimit të dy vendeve dhe besimit francez në potencialin dhe të ardhmen e Kosovës.
Në kontekstin e sfidave aktuale të sigurisë në Evropë, Konjufca theksoi se besueshmëria e projektit evropian varet nga një zgjerim më i shpejtë dhe i drejtë, bazuar në merita. “Kosova ka bërë zgjedhjen e saj strategjike dhe zgjedhja jonë është Evropa, Bashkimi Evropian”, përfundoi ai.
Nga ana e tij, Ministri i Deleguar për Evropën i Francës, Benjamin Haddad, rikonfirmoi mbështetjen e Parisit për zhvillimin dhe perspektivën evropiane të Kosovës. Haddad theksoi miqësinë e kahershme dhe angazhimin personal ndaj Kosovës, duke shtuar se vizita e tij synonte t’i jepte një shtysë të re marrëdhënieve dypalëshe.
Ai u shpreh i kënaqur për nënshkrimin e pesë marrëveshjeve “gjithëpërfshirëse”, të cilat krijojnë perspektivë për bashkëpunim afatgjatë. Haddad njoftoi se ishte shoqëruar nga disa kompani franceze dhe Agjencia Franceze për Zhvillim (AFD), me synimin për të forcuar marrëdhëniet tregtare dhe investimet franceze në Kosovë.
Mbështetja e AFD-së për Kosovën është tashmë e konsiderueshme, me 80 milionë euro të alokuara për tranzicionin energjetik dhe luftën kundër ndryshimeve klimatike. Së fundmi, u nënshkrua edhe një kredi prej 60 milionë eurosh për rinovimin e kompleksit të banimit të studentëve, i cili do të shërbejë si Fshat Olimpik për Lojërat Mesdhetare 2030. Projekti do të përfshijë gjithashtu investime në objekte sportive dhe shkolla rreth Qendrës Studentore, duke sjellë përfitime të shumta përtej vetë Lojërave Mesdhetare.