Akti Gjithëpërfshirës i Bashkimit Evropian për Inteligjencën Artificiale (IA) ka hyrë në fuqi ditën e dielë. Ky ligj i ri kërkon nga kompanitë të identifikojnë qartë materialet e krijuara ose të manipuluara nga Inteligjenca Artificiale.
Në thelb, neni 50 i këtij ligji detyron ofruesit e aplikacioneve të bisedës (chatbot-ëve) dhe sistemeve të tjera interaktive të IA-së të informojnë përdoruesit kur po komunikojnë me një inteligjencë artificiale, përveç rasteve kur kjo është tashmë e dukshme.
Sipas Komisionit Evropian, ofruesit e sistemeve që janë në gjendje të prodhojnë tekst, imazhe, video ose audio sintetike duhet të vendosin shenja dixhitale të lexueshme nga makineria, të cilat do të mundësojnë zbulimin e materialit si të gjeneruar ose manipuluar nga IA-ja.
Kompanitë dhe përdoruesit e tjerë profesionalë që shpërndajnë sisteme të IA-së janë të detyruar të ofrojnë etiketa të qarta dhe të kuptueshme kur publikojnë “deepfakes” ose tekste të krijuara nga IA-ja mbi çështje me interes publik, të cilat nuk i janë nënshtruar një rishikimi njerëzor apo një kontrolli redaksional të rëndësishëm. Ata gjithashtu duhet të informojnë personat që i ekspozohen sistemeve të njohjes së emocioneve të bazuara në IA ose sistemeve të kategorizimit biometrik.
Komisioni thekson se këto kërkesa synojnë të reduktojnë mashtrimin, imitimin dhe dezinformimin, duke u mundësuar individëve të përcaktojnë nëse materiali që shohin, dëgjojnë apo lexojnë është autentik.
**Masat kundër “deepfakes”**
“Deepfakes” përkufizohen nga ligji si imazhe, audio ose video të krijuara apo manipuluara nga IA-ja, të cilat paraqesin njerëz, objekte, vende ose ngjarje ekzistuese dhe që, në mënyrë të rreme, duken autentike.
Tekstet e krijuara nga IA-ja, që lidhen me politikën, shëndetin publik, sigurinë, mjedisin, sigurinë e konsumatorëve, shkencën, kulturën dhe tema të tjera të debatit publik, duhet të etiketohen nëse publikohen pa mbikëqyrje redaksionale njerëzore. Materiali që i është nënshtruar një rishikimi thelbësor njerëzor nuk kërkon etiketim. Megjithatë, Komisioni theksoi se kontrollet sipërfaqësore, të kufizuara në drejtshkrim, gramatikë apo formatim, nuk do të konsiderohen kontroll redaksional domethënës.
Dispozita të veçanta aplikohen për veprat artistike, krijuese, satirike dhe fiktive që përmbajnë “deepfakes”. Detyrimi për zbulim mbetet, por informacioni mund të paraqitet në një mënyrë që nuk pengon përjetimin ose prezantimin e veprës.
Personat që e përdorin IA-në për qëllime thjesht personale dhe joprofesionale përjashtohen nga fushëveprimi i këtij ligji. Megjithatë, individët që e përdorin rregullisht atë për përfitime ekonomike, si pjesë e një biznesi, tregtie, veprimtarie të pavarur apo profesionale, konsiderohen si përdorues profesionalë dhe për rrjedhojë, i nënshtrohen kërkesave të ligjit.