Vedat Muriqi Shënon Golin e Fitores Ndaj Real Madridit, Rrëfen Zhgënjimet dhe Ëndrrën e Kupës së Botës
Vedat Muriqi u shndërrua në protagonistin kryesor të ndeshjes së sotme, duke udhëhequr Mallorcën drejt një fitoreje të madhe me rezultatin 2-1 kundër Real Madridit në La Liga.
Skuadra ishullore triumfoi ndaj “Mbretërve” me rezultatin 2-1. Golin e fitores për Mallorcën e shënoi sulmuesi i Kombëtares së Kosovës, Vedat Muriqi, në minutën e 91-të të ndeshjes.
Pas përfundimit të takimit, Muriqi ndau me publikun emocionet e tij, duke falënderuar njëkohësisht tifozët për mbështetjen.
“Sapo kisha humbur një penallti, më pas dështuam në play-off dhe humba ëndrrën më të madhe të jetës sime, atë të Kupës së Botës. Dhe papritmas, vjen një gol fantastik,” u shpreh ai. “Faleminderit shumë tifozëve, e vlerësoj mbështetjen tuaj, më bën të lumtur. Do të vazhdojmë të luftojmë për Mallorcën.”
Deri më tani, Muriqi ka shënuar 19 gola dhe ka dhënë një asist në La Liga.
Pas kësaj fitoreje, Mallorca aktualisht renditet në vendin e 17-të në La Liga, duke u distancuar nga zona e rënies pas triumfit ndaj 35-herë kampionit të Spanjës.