**Todd Blanche konfirmohet si Prokuror i Përgjithshëm i SHBA-së**
Todd Blanche, ish-avokati personal i ish-Presidentit Donald Trump, është konfirmuar si Prokuror i Përgjithshëm i Shteteve të Bashkuara, duke marrë kështu pozicionin kryesor të zbatimit të ligjit në vend.
Blanche siguroi konfirmimin me një votim të ngushtë 50-49, ndërsa senatorët republikanë Susan Collins dhe Lisa Murkowski votuan kundër tij.
Senatori Bill Cassidy dha votën vendimtare, pasi deklaroi se besonte që Blanche ishte kandidati më i mirë që presidenti do të emëronte. Uashingtoni priste me ankth vendimin e Cassidy, për shkak të tensioneve disavjeçare mes ish-Presidentit Trump dhe senatorit.
Votimi i jep fund një ngërçi të gjatë mes republikanëve të Senatit dhe administratës së ish-Presidentit Trump lidhur me Blanche, i cili ka shërbyer si prokuror i përgjithshëm në detyrë që nga muaji prill.
Të gjithë demokratët votuan kundër emërimit të tij për të drejtuar Departamentin e Drejtësisë, raporton BBC.
Disa senatorë republikanë kishin shprehur shqetësime lidhur me menaxhimin e tij të publikimit të dokumenteve që lidhen me Jeffrey Epstein dhe rolin e tij në krijimin e një fondi prej 1.8 miliardë dollarësh nga ish-Presidenti Trump, i cili synonte të kundërshtonte atë që ai e quante “armatizim” të qeverisë.
Ky fond parashikonte të ofronte kompensim për individët që pretendonin se ishin persekutuar nga qeveria. Megjithatë, kritikët, përfshirë senatorin Murkowski, kishin frikë se fondi do t’u shkonte individëve të ndjekur penalisht për pjesëmarrjen në sulmin ndaj Kongresit më 6 janar.
Blanche u zotua përfundimisht të tërhiqte fondin pas reagimeve të forta të senatorëve republikanë gjatë seancave të tij të konfirmimit.