Aktorja dhe këngëtarja hollivudiane Selena Gomez po paditet nga pesë investitorë që kanë financuar Wondermind Global, një kompani e fokusuar te shëndeti mendor, të cilën ajo e themeloi së bashku me nënën e saj.
Investitorët pretendojnë se ylli i muzikës nuk ka përmbushur premtimet se do të ishte “aktivisht e angazhuar në ndërtimin” e markës.
Sipas tyre, “neglizhenca e plotë e detyrimeve të saj” e ka lënë kompaninë në një “gjendje katastrofike financiare”.
Padia kërkon rikthimin e rreth 1.2 milionë dollarëve (afërsisht 890 mijë paund), që pretendohet se janë investuar në kompani, si dhe kompensim për dëmet dhe kostot e tjera.
BBC ka kontaktuar Wondermind dhe përfaqësuesit e Gomez për një koment.
Gomez, e cila u bë e famshme si aktore që në fëmijëri përpara se të kalonte në muzikën pop, themeloi platformën e shëndetit mendor pesë vjet më parë së bashku me nënën e saj, Mandy Teefey, dhe sipërmarrësen Daniella Pierson.
Nisma erdhi pasi Gomez kishte folur publikisht për vështirësitë e saj me shëndetin mendor, përfshirë çrregullimin bipolar.
34-vjeçarja është ndër gratë më të ndjekura në botë në rrjetet sociale, me më shumë se 500 milionë ndjekës, ndërsa pasuria e saj neto vlerësohet në afro 1 miliard dollarë.
Ajo është gjithashtu themeluese e kompanisë së kozmetikës Rare Beauty, të krijuar në vitin 2020, e cila lidhet ngushtë me emrin dhe imazhin e saj.
Wondermind synonte ta bënte përmbajtjen rreth shëndetit mendor më të aksesueshme për publikun përmes një platforme dixhitale, ndërsa kompania kërkoi investitorë për të mbështetur projektin.
Megjithatë, padia pretendon se themeluesit e Wondermind “paraqitën në mënyrë të rreme” situatën e kompanisë, duke lënë të kuptohej se një sërë marrëveshjesh reklamimi, kopertinash me personazhe të famshëm, një aplikacion dhe iniciativa të tjera ishin tashmë duke u zhvilluar.
Sipas padisë, investitorëve iu premtua gjithashtu se Gomez do të luante një rol aktiv si drejtuese e marketingut të kompanisë.