Rita Ora ka ndarë me ndjekësit një përmbledhje të momenteve më të bukura të verës së saj, pas pushimeve në disa destinacione me diell në Evropë. Këngëtarja me origjinë nga Kosova publikoi një seri fotografish nga udhëtimi i fundit në Ibiza, ku po pushon së bashku me bashkëshortin e saj, Taika Waititi.
35-vjeçarja publikoi të dielën në Instagram disa fotografi me bikini, mes tyre edhe pamje nga jahti ku çifti po kalon pushimet me miqtë.
Në një prej fotografive, Rita shfaqet me bikini ngjyrë argjendi ndërsa pozon në jaht, ndërsa në të tjera shihet duke u freskuar në det. Këngëtarja bëri të ditur se disa nga pamjet në ujë ishin realizuar me syzet inteligjente Meta.
Në një tjetër fotografi, ajo pozon në skajin e anijes me bikini të zeza pa rripa.
“Summer so far pt 1”, shkroi Rita krahas albumit fotografik, duke paralajmëruar se mund të publikojë edhe pjesë të tjera nga vera e saj.
Pushime në jaht me Taika Waititi dhe miqtë
Në jaht, përveç Ritës dhe Taika Waititit, ndodhen edhe mikja e saj Lady Mary Charteris, bashkëshorti i saj Robbie Furze dhe vajza e tyre, Wilde Jessie Furze.
Rita shfrytëzoi motin e ngrohtë spanjoll duke bërë snorkeling në Detin Mesdhe dhe duke kaluar pjesën më të madhe të kohës në ujë, para se të rikthehej në jaht.
Pushimet e këtij muaji kanë edhe domethënie të veçantë për çiftin, pasi në gusht Rita dhe Taika festojnë përvjetorin e katërt të martesës.
Regjisori nga Zelanda e Re gjithashtu mbush 51 vjeç gjatë këtij muaji.
Rita po punon për albumin e katërt
Pavarësisht pushimeve, Rita Ora vazhdon të jetë e angazhuar me projekte të reja profesionale.
Ajo aktualisht po punon në albumin e saj të katërt, ndërsa së fundmi është rikthyer edhe në rolin e Queen of Hearts në projektin “Descendants”.
Sot ajo është një prej artisteve britanike më të njohura ndërkombëtarisht, me një pasuri që sipas raportimeve vlerësohet në rreth 26 milionë paund.
Megjithatë, Rita ka folur shpesh për kontrastin mes jetës së saj aktuale dhe fëmijërisë.
“Jam krenare që jam emigrante”
Rita Ora ka lindur në Prishtinë, ndërsa familja e saj u largua nga Kosova në fillim të viteve ’90, gjatë periudhës së represionit ndaj shqiptarëve.
Në atë kohë, nëna e saj Vera ishte mjeke, ndërsa babai Besniku ekonomist. Pas mbërritjes në Mbretërinë e Bashkuar, familja mësoi anglishten dhe nisi jetën nga e para.
Babai i saj ndryshoi profesion dhe punoi në menaxhimin e një pub-i në Londër, ndërsa nëna e saj u rikualifikua dhe vazhdoi karrierën si psikiatre.
Në një intervistë të fundit për The Times, Rita foli për përvojën e saj si fëmijë refugjatësh dhe për mënyrën se si e sheh debatin mbi emigracionin në Britani.
“Gjithçka që di është se jam gjithmonë mirënjohëse për arsimimin që kam marrë dhe jam krenare që jam emigrante”, tha ajo.
Sipas këngëtares, shumë emigrantë kanë një energji të veçantë që i shtyn vazhdimisht të përmirësohen dhe të provojnë vlerën e tyre.
“Edhe nëse nuk janë brezi i parë, nëse shikoni historinë e shumë artistëve të mëdhenj, shpesh gjeni një histori emigracioni në familjet e tyre”, shtoi Rita.
Kosova shpalli pavarësinë në shkurt të vitit 2008 dhe është shteti më i ri në Evropë, ndërsa Rita Ora vazhdon ta theksojë me krenari origjinën e saj kosovare në intervista dhe paraqitje ndërkombëtare. /GazetaExpress/