Një video që shfaq arrestimin e një nëne nga agjentët e Zyrës së Imigracionit dhe Doganave të SHBA (ICE) në Aeroportin Ndërkombëtar të San Franciskos, para vajzës së saj të mitur, ka ndezur reagime të ashpra nga zyrtarë lokalë dhe përfaqësues politikë në Kaliforni.
Videoja, e shpërndarë të hënën nga një kanal lokal i NBC-së, tregon gruan duke qarë dhe bërtitur, ndërsa agjentët e ICE-së tentonin ta shtrinin në tokë dhe ta prangosnin. Vajza e saj e mitur shfaqet gjithashtu në video, duke lotuar.
Senatori demokrat i Kalifornisë, Scott Weiner, e kritikoi ashpër incidentin, duke theksuar se veprimet e oficerëve federalë shkaktojnë “terror dhe kaos”. Kryetari i Bashkisë së San Franciskos, Daniel Leury, e cilësoi gjithashtu arrestimin si “shqetësues”.
Departamenti Amerikan i Sigurisë Kombëtare, nën mbikëqyrjen e të cilit operon ICE, konfirmoi se nëna, Angelina Lopez-Jimenez, dhe vajza e saj, Wendy Godinez-Lopez, u arrestuan për shkelje të ligjit të imigracionit. Familjes i ishte lëshuar urdhër largimi për t’u kthyer në Guatemalë që në vitin 2019.
Përfaqësuesja demokrate Doris Matsui, theksoi se gruaja e arrestuar jeton në Sacramento dhe e përshkroi atë si “një fqinje dhe anëtare të komunitetit tonë”. Ndërkohë, postime të shumta në rrjetet sociale, përfshirë ato të gazetarëve, theksonin dramën e ndarjes së nënës nga fëmija e saj, duke vënë në pikëpyetje nevojën për një arrestim të tillë të menjëhershëm.
Veprimet e ICE-së, shpesh të lidhura me politikat anti-imigracion të ish-presidentit Donald Trump, janë dënuar gjerësisht nga mbrojtësit e të drejtave të njeriut. Këta të fundit argumentojnë se operacionet e tilla shkelin të drejtat e procesit ligjor dhe krijojnë një mjedis të pasigurt, sidomos për pakicat etnike. Trump ka pohuar më parë se këto veprime synojnë përmirësimin e sigurisë dhe reduktimin e imigracionit të paligjshëm.
Autoritetet e aeroportit deklaruan se nuk ishin të përfshira në incident, duke e cilësuar atë si “të izoluar”. Ato theksuan se operacionet e fluturimit dhe proceset e imbarkimit të pasagjerëve vazhduan normalisht, pa asnjë ndikim. Edhe Policia e San Franciskos bëri të ditur se nuk ka pasur asnjë përfshirje në ngjarje.