Beogradi i ka shprehur shqetësim Përfaqësuesit Special të Bashkimit Evropian (BE) për dialogun Kosovë-Serbi, Peter Sorensenit, pas deklaratës së fundit të BE-së se janë plotësuar kushtet për hapjen e urës kryesore mbi lumin Ibër në Mitrovicë. Këtë shqetësim e ka bërë të ditur drejtori i Zyrës serbe për Kosovën, Petar Petkoviq, nëpërmjet një letre.
Petkoviq theksoi se një vlerësim i tillë është veçanërisht shqetësues, pasi, sipas tij, ai nuk pasqyron situatën reale në terren dhe injoron mosplotësimin e parakushteve kryesore, të dakorduara më herët në kuadër të dialogut.
Ai rikujtoi se, sipas Marrëveshjes për Urën të 25 gushtit 2015, çështjet e lëvizjes së lirë, punimeve infrastrukturore dhe hapjes së urës janë lidhur drejtpërdrejt me çështjet e sigurisë, të cilat janë thelbësore për qytetarët serbë në Suhadoll dhe zonat e tjera të ndjeshme përreth urës.
Petkoviq shtoi se situata aktuale e sigurisë, sidomos në veri të Kosovës, e bën të rrezikshme hapjen e urës tani dhe do të shtonte ndjenjën e pasigurisë tek serbët. Këtë e bëri të ditur në letrën e parë nga agjencia serbe Tanjug.
Ai theksoi gjithashtu se BE-ja, si ndërmjetësuese dhe garantuese e dialogut, ka përgjegjësi të ruajë neutralitetin dhe të sigurojë kushtet për zgjidhjen e çështjeve të mbetura përmes marrëveshjes ndërmjet palëve.
Petkoviq i bëri të qartë Sorensenit se vendimi për hapjen e urës mund të merret vetëm pas zbatimit të plotë të obligimeve të marra në dialog dhe pas një vlerësimi të besueshëm sigurie. Ky vlerësim, sipas tij, duhet të garantojë se hapja nuk do të rrezikojë sigurinë e qytetarëve serbë, nuk do të rrisë tensionet aktuale apo të shkaktojë një krizë të re në veri të Kosovës.
Ndërkohë, Bashkimi Evropian i tha portalit Kosovo Online se të gjitha vendimet për urën mbi Ibër duhet të marrin parasysh interesat dhe shqetësimet e të gjitha komuniteteve.
Një zëdhënës i BE-së theksoi se qëndrimi i tyre për urën ka qenë gjithmonë i qartë: ajo duhet t’u shërbejë të gjitha komuniteteve dhe komunave që lidh, duke kontribuar në bashkëpunim dhe marrëdhënie të mira. Ai shtoi se, pas transferimit të qeverisjes lokale në veri, është thelbësore të përmirësohet koordinimi efektiv dhe konsultimet kuptimplota ndërmjet komunave përkatëse dhe institucioneve qendrore.