Bordi i Paqes në Gaza i ka dhënë Hamasit afat deri në fund të kësaj jave për të pranuar një propozim çarmatimi. Ky afat vjen ndërsa organi ndërkombëtar, i udhëhequr nga Shtetet e Bashkuara, është i vendosur të avancojë rindërtimin e enklavës palestineze. Lajmi u bë i ditur për “The Times of Israel” nga tre burime të njohura me çështjen.
Nickolay Mladenov, Përfaqësuesi i Lartë i Bordit të Paqes për Gazën, u takua të premten në Kajro me një delegacion të zyrtarëve të lartë të Hamasit. Gjatë takimit, organizata u informua se Bordi dëshiron që një marrëveshje çarmatimi të finalizohet deri në fund të javës.
Burimet sqaruan se ndryshime të vogla në propozimin për çarmatim do të shqyrtoheshin, por kërkesat e Hamasit për ndryshime thelbësore nuk do të pranoheshin.
Mladenov shprehu bindjen se është e mundur të ecet përpara me fazën e dytë të planit të Presidentit amerikan Donald Trump për t’i dhënë fund luftës në Gaza, megjithëse vendet ndërmjetësuese të Lindjes së Mesme – Egjipti, Katari dhe Turqia – nuk janë po aq optimiste, sipas një diplomati arab.
Ndërmjetësit po bëjnë presion ndaj Hamasit që të pranojë propozimin e çarmatimit të mbështetur nga SHBA-ja. Megjithatë, sipas diplomatit arab nga një prej vendeve ndërmjetësuese, organizata “nuk ka gjasa të thotë ‘po’ pa ndonjë kusht thelbësor”.