Raporti PISA paralajmëron: Telefonat në klasë dhe shpërqendrimi i nxënësve
*Analizë nga Albert Kurtulaj*
Çështja e përdorimit të telefonave celularë nga nxënësit në shkolla, një temë shpesh e diskutuar, kërkon një trajtim të ri. Sipas Albert Kurtulaj, tashmë fokusi duhet të zhvendoset nga thjesht ndalimi drejt zbatimit praktik dhe përgjegjësisë kolektive, sidomos në dritën e paralajmërimeve të raportit PISA për ndikimin negativ te përqendrimi i nxënësve.
Nëse tashmë ekziston një Udhëzim Administrativ apo vendim relevant që rregullon përdorimin e telefonave gjatë orëve të mësimit, atëherë Drejtoritë Komunale të Arsimit (DKA) dhe vetë shkollat kanë detyrim të ndërmarrin hapa konkretë për zbatimin e tij uniform.
Si zgjidhje praktike, Kurtulaj sugjeron pajisjen e çdo klase me dollapë ose kuti të posaçme ku nxënësit të vendosin telefonat e tyre në fillim të orës dhe t’i marrin vetëm pas përfundimit të procesit mësimor. Kjo masë do të qartësonte rregullin, do ta bënte më të zbatueshëm dhe do të eliminonte debatet e panevojshme. Është thelbësore që ky sistem të shoqërohet me rregulla të qarta mbi përgjegjësinë, sigurinë dhe trajtimin e rasteve urgjente, duke garantuar kështu që zgjidhja të jetë praktike dhe e pranueshme për të gjithë palët.
Një rol kyç në këtë proces luajnë edhe prindërit. Nëse shkolla vendos kufizime për përdorimin e telefonave gjatë mësimit, prindërit duhet të mbështesin këtë rregull dhe të shmangin komunikimin me fëmijët e tyre gjatë orëve të mësimit për çështje jo-urgjente. Për raste të veçanta apo urgjente, komunikimi mund të realizohet gjithmonë përmes administratës së shkollës.
Kurtulaj thekson se synimi nuk është privimi i nxënësve nga telefonat e tyre, por krijimi i një mjedisi ku përqendrimi te mësimi të jetë maksimal. Klasa duhet të shërbejë si një hapësirë dedikuar dijes, përqendrimit, bashkëpunimit dhe komunikimit të drejtpërdrejtë. Për këtë arsye, zbatimi i çdo rregulli duhet të mbështetet nga zgjidhje konkrete, infrastrukturë e përshtatshme dhe një bashkëpunim i ngushtë mes shkollës, mësimdhënësve, Drejtorive Komunale të Arsimit, nxënësve dhe prindërve. Rregullat fitojnë kuptim dhe efikasitet vetëm kur janë të qarta, kur sigurohen kushtet për zbatimin e tyre dhe kur mbështeten unanimisht nga të gjithë.