**Pritet Ulje e Çmimeve të Karburanteve në Kosovë, Pas Rënies në Tregjet Ndërkombëtare**
Çmimet e naftës së papërpunuar kanë rënë në tregjet ndërkombëtare dhe kjo pritet të pasqyrohet shpejt edhe në Kosovë. Sipas kryetarit të Shoqatës së Naftëtarëve të Kosovës, Fadil Berjani, shoferët në vend do t’i ndjejnë efektet e kësaj uljeje shumë shpejt.
Berjani theksoi se megjithëse ulja e çmimeve në bursë do të pasqyrohet edhe në Kosovë, kjo nuk pritet të ndodhë menjëherë.
Duke folur të mërkurën për portalin Indeksonline, Berjani deklaroi: “Sot çmimi në bursë po ulet dhe kjo pritet të pasqyrohet shumë shpejt edhe në Kosovë.”
Aktualisht, çmimet e karburanteve në tregun vendor janë: dizeli 1.89 euro për litër, ndërsa benzina 1.46 euro për litër.
Megjithatë, ai ka theksuar se nuk mund të jepen afate të sakta kohore për uljen e çmimeve në tregun vendor.
“Nuk mund të parashikojmë saktësisht se kur do të ulen çmimet në vend, pasi gjithçka varet nga zhvillimet në bursat ndërkombëtare,” u shpreh Berjani.
Sipas tij, ulja e çmimeve lidhet me zhvillimet ndërkombëtare dhe pritjet për marrëveshje që po ndikojnë në stabilizimin e tregut global të naftës.