Ish-kryeministri i Kosovës, Isa Mustafa, ka theksuar rëndësinë e hapësirës për marrëveshje mes pozitës dhe opozitës në zgjidhjen e çështjes së zgjedhjes së presidentit të vendit.
Mustafa, sipas raportimit të Ekonomia Online, ka deklaruar se nëse dëshirohet një zgjidhje për këtë çështje, është e domosdoshme të krijohet një ambient bashkëpunimi. “Nëse dëshirojmë zgjidhje, ose nëse jemi të gatshëm edhe si pozitë, edhe si opozitë, ta zgjedhim presidentin, atëherë duhet të ketë hapësirë për marrëveshje,” ka theksuar ai. Mustafa shtoi se palët duhet të ulen dhe të bien dakord për një personalitet, i cili “do ta kryente këtë punë pa anësi politike.”
I pyetur nëse Vjosa Osmani do të kthehej në Lidhjen Demokratike të Kosovës (LDK), Mustafa refuzoi të prononcohej, duke shpjeguar se nuk ishte momenti i duhur për të folur rreth kësaj teme.
“Do t’ju kërkoj falje, sepse sot është një temë krejt tjetër,” deklaroi Mustafa. “Nuk do të dëshiroja që sot këtë çështje që e kemi hapur këtu në Akademi ta lidhim me emra konkretë, kush synon e kush çfarë ka bërë. Mund ta shfrytëzojmë ndonjë rast tjetër që unë të jap qëndrimin tim politik.”