**Ish-Prokurori i Hagës: E Paprecedentë Përmendja e Shtatë Emrave në Aktgjykimin ndaj Katërshës së UÇK-së**
Geoffrey Nice, ish-prokuror në Tribunalin Penal Ndërkombëtar për ish-Jugosllavinë (TPNJ), e ka cilësuar si “të paprecedentë” mënyrën e përmendjes së shtatë ish-pjesëtarëve të Ushtrisë Çlirimtare të Kosovës (UÇK) – Brahimaj, Limaj, Sylejman Selimi, Mustafa, Gashi, Buja dhe Geci – në aktgjykimin e çështjes ndaj Hashim Thaçit, Kadri Veselit, Rexhep Selimit dhe Jakup Krasniqit.
Në një prononcim për Radion Evropa e Lirë (REL), Nice theksoi se në aktgjykime të rasteve të ngjashme është e zakonshme të përmendet se një person ka vepruar “në kuadër të një ndërmarrjeje të përbashkët kriminale me persona të panjohur”.
Megjithatë, ai shtoi se përfshirja e drejtpërdrejtë e shtatë emrave në aktgjykimin e çështjes ndaj katër ish-drejtuesve të UÇK-së është e pazakontë.
Nice nënvizoi rëndësinë e pritjes së publikimit të plotë të aktgjykimit, për të kuptuar nëse trupi gjykues do të ofrojë një arsyetim të qartë mbi arsyet specifike të përmendjes së këtyre shtatë personave në rastin kundër ish-krerëve të UÇK-së.