Pep Guardiola po planifikon të rikthehet në Etihad Stadium më 14 tetor, në një “shfaqje mbështetjeje” për ish-klubin e tij Manchester City, teksa beteja e klubit me Premierligën vazhdon.
Të martën (29 shtator) u njoftua se City është shpallur fajtor për të gjitha akuzat që lidhen me shkelje të rënda të rregullave financiare të Premierligës, pas një vendimi nga një komision i pavarur.
Komisioni konstatoi se, midis sezoneve 2009/10 dhe 2017/18, klubi kishte aranzhuar kontrata “fiktive” me partnerë komercialë si pjesë e një “skeme të financimit të kamufluar”, me qëllim rritjen artificiale të të ardhurave të klubit me 830 milionë funte.
Të premten, City konfirmoi se ka apeluar vendimin lidhur me shkeljet e rregullave të Premierligës.
Siç thuhet në një deklaratë të Premierligës, seanca e bordit të pavarur të apelit do të mbetet private dhe konfidenciale deri në publikimin e vendimit përfundimtar.
Një pjesë e rregulloreve të Premierligës thotë se një seancë apeli duhet të përfundojë brenda 12 javësh nga zhvillimi i saj dhe se vendimi duhet të komunikohet brenda 30 ditësh nga përfundimi i seancës, megjithëse ky afat mund të ndryshojë nëse konsiderohet e nevojshme.
Vetëm disa orë pasi City konfirmoi se do të apelonte vendimin, u raportua se Guardiola po planifikon një “rikthim befasues” në “Etihad”, në atë që është përshkruar si një “shfaqje mbështetjeje” për ish-klubin e tij.
Një raportim i “The Express” pretendon se 55-vjeçari, i cili u largua nga posti i trajnerit të Cityt në fund të sezonit 2025/26, u ka thënë drejtuesve të lartë të klubit se dëshiron të jetë “me njerëzit e tij”.
Ndeshja që Guardiola raportohet se planifikon të ndjekë është përballja e Cityt me Paris Saint-Germain në Ligën e Kampionëve më 14 tetor, ndeshje e cila do të zhvillohet në Etihad.
Në fillim të kësaj jave, Guardiola publikoi një mesazh mbështetjeje për lojtarët dhe stafin e Manchester Cityt, si dhe për tifozët dhe pronarët e klubit, pasi City u shpall fajtor për të gjitha akuzat që lidhen me shkelje të rënda të rregullave financiare të Premierligës.
“Dua që çdo tifoz i Manchester Cityt në mbarë botën ta dijë se jam këtu; më shumë se kurrë. Unë jam, gjithmonë kam qenë dhe gjithmonë do të jem në krah të klubit tim, pronarit tim, kryetarit tim, Ferranit, lojtarëve, stafit, Enzos [Maresca] dhe juve, tifozëve tanë unikë”, tha ai.
“Dua ta bëj të qartë: do ta kalojmë këtë së bashku. Ju dua të gjithëve”, e mbylli ai./GazetaExpress/