Kryebashkiaku francez Bally Bagayoko, i Saint-Denis, u ka dalë në mbrojtje nxënësve protestues, duke ndërhyrë mes tyre dhe policisë gjatë përplasjeve të fundit. Ai ka deklaruar se ndërhyri për të parandaluar lëndimin e të rinjve.
Bagayoko, kryetar i komunës në periferi të Parisit dhe anëtar i partisë së majtë LFI, është parë duke qëndruar midis forcave të rendit dhe protestuesve të rinj, duke u bërë thirrje policëve të ndalnin ndërhyrjen.
Në një intervistë për CNN me gazetaren Saskya Vandoorne, kryebashkiaku shpjegoi se policia, e pajisur me mburoja, helmeta dhe gaz lotsjellës, kishte ndërhyrë pasi pranë vendit të protestës ishin djegur disa kontejnerë. Ai theksoi se vendosi të ndërhynte për të parandaluar lëndimin e nxënësve.
“U përballëm qartë me forcat e rendit dhe unë ndërhyra për të parandaluar që të lëndonin nxënësit”, deklaroi Bagayoko për CNN.
Protestat e nxënësve në Francë vazhdojnë prej disa javësh dhe janë përhapur në shumë qytete. Ata kërkojnë më shumë mësues, klasa më të vogla dhe investime më të mëdha në arsimin publik, duke kundërshtuar kushtet e këqija në shkolla dhe mungesën e stafit.
Bagayoko është shprehur se nxënësit protestues “mund të ishin fëmijët e tij” dhe se ai e konsideron detyrë të qëndrojë në krah të tyre. Ndërkohë, përplasjet midis protestuesve dhe policisë kanë rezultuar në dhjetëra incidente, arrestime dhe përdorim të gazit lotsjellës. Qeveria franceze ka premtuar shqyrtimin e kërkesave të nxënësve.