Fotografi të aktorit dhe komedianit britanik Russell Brand, të realizuara në një dhomë hoteli pak përpara një përdhunimi të pretenduar, janë paraqitur si prova në Gjykatën e Kurorës në Southwark të Londrës.
Gruaja që e akuzon Brand për përdhunim ka dëshmuar se ai kishte kërkuar me ngulm ta fotografonte pa bluzë, përpara se, sipas saj, situata të merrte një kthesë të frikshme.
Russell Brand po përballet me një proces gjyqësor lidhur me akuza për përdhunim dhe sulme seksuale. Gjashtë gra e kanë akuzuar atë për abuzime të dyshuara seksuale gjatë një periudhe dhjetëvjeçare, nga viti 1999 deri në vitin 2009.
Gjatë seancës gjyqësore, njëra nga gratë që e akuzon komedianin për përdhunim ka rrëfyer se si ishte njohur me të gjatë një shfaqjeje kabareje, ku Brand po performonte.
Ajo ndodhej mes publikut dhe, sipas dëshmisë së saj, fillimisht nuk kishte menduar se komediani kishte interes seksual ndaj saj.
Madje, gruaja ka treguar se në fillim kishte menduar se Brand ishte homoseksual.
Ajo kujtoi momentin kur aktori iu afrua, e tërhoqi nga bishti i flokëve dhe i tha “bu”, në përpjekje për ta trembur me shaka.
“Ai sillej si fëmijë, ishte shumë lozonjar. Nuk u ndjeva e kërcënuar prej tij”, ka dëshmuar gruaja para trupit gjykues.
Sipas saj, të dy kishin biseduar për disa orë, duke diskutuar edhe mundësinë e realizimit të një shfaqjeje teatrore.
Duke qenë se biseda po vazhdonte në një atmosferë miqësore, ajo e kishte ftuar Brand në dhomën e hotelit ku po qëndronte, në Bournemouth, për të vazhduar diskutimin.
“Doli nga banja pa bluzë dhe kërkoi ta fotografoja”
Gruaja ka rrëfyer se situata ndryshoi papritur pasi Brand hyri në banjën e dhomës së hotelit.
Sipas dëshmisë së saj, komediani doli nga banja me pjesën e sipërme të trupit të zhveshur dhe kërkoi me ngulm që ajo t’i bënte fotografi.
Më pas, ai nisi të sillej në mënyrë të çuditshme, duke kërcyer nëpër dhomë dhe duke imituar lëvizje komike, përfshirë marshimin karakteristik të personazhit televiziv Basil Fawlty.
“Më kujtohet se dukej si një struc, si një zog, sepse kishte këmbë shumë të gjata”, ka treguar gruaja.
Ajo ka theksuar se, pavarësisht përpjekjeve të tij për t’u dukur qesharak, situata nuk i dukej aspak argëtuese.
“Unë nuk po qeshja. Mbaj mend vetëm që ai kërcente lart e poshtë dhe sillej në mënyrë qesharake”, është shprehur ajo.
Gruaja ka dëshmuar se sjellja e papritur e Brand e kishte tronditur dhe se në ato momente ishte ndier e paralizuar nga frika.
“Çfarë dreqin kam bërë që jam futur në këtë situatë?”, ka kujtuar ajo mendimin që i kishte kaluar nëpër kokë.
Sipas akuzës së saj, Brand më pas e kishte përdhunuar.
Fotografitë paraqiten si prova në gjykatë
Gjatë procesit gjyqësor, jurisë iu shfaqën fotografitë që gruaja pretendon se i kishte realizuar në dhomën e hotelit, pak përpara incidentit të dyshuar.
Pamjet tregojnë Brand pa bluzë dhe, sipas dëshmisë së gruas, janë realizuar pasi ai kishte këmbëngulur që ajo ta fotografonte.
Fotografitë janë publikuar më pas edhe nga Policia Metropolitane e Londrës.
Brand, 51 vjeç, është deklaruar i pafajshëm për të shtatë akuzat që lidhen me gjashtë gra, përfshirë tri akuza për përdhunim, tri për sulm seksual dhe një për sulm të pahijshëm seksual.
Ai i mohon akuzat dhe pretendon se marrëdhëniet seksuale kanë qenë me pëlqimin e palëve.
Procesi gjyqësor është ende në zhvillim, ndërsa gjykata pritet të shqyrtojë dëshmitë dhe provat e paraqitura nga të dyja palët.
Deri në një vendim përfundimtar të gjykatës, Russell Brand prezumohet i pafajshëm. /GazetaExpress/