Aeroporti i Tiranës hedh poshtë thashethemet: Fluturimet vijojnë normalisht
**Tiranë** – Aeroporti Ndërkombëtar i Tiranës (TIA) ka mohuar kategorikisht informacionet e rreme të shpërndara në rrjetet sociale lidhur me funksionimin e tij. Përmes një njoftimi zyrtar, aeroporti sqaroi se të gjitha operacionet po vijojnë normalisht dhe me kapacitet të plotë.
Në njoftimin e TIA-s theksohet se të gjitha fluturimet, si ato hyrëse ashtu edhe dalëse, po kryhen sipas orareve të parashikuara. Nuk ka asnjë ndërprerje të shërbimeve dhe aeroporti është në operim të plotë, duke u shërbyer me efikasitet pasagjerëve.
Administrata e aeroportit u bën thirrje qytetarëve që për çdo informacion lidhur me fluturimet dhe ecurinë e punës së tij, t’u referohen vetëm kanaleve zyrtare të komunikimit.
“Transparenca e plotë është detyrimi ynë kryesor,” thuhet në deklaratën e Aeroportit Ndërkombëtar të Tiranës.