Ndërpriten xhirimet e filmit të Michael B. Jordan, arrestohet një 23-vjeçar i dyshuar për kërcënim me thikë
Xhirimet e filmit të ri aksion “Miami Vice ’85”, me protagonistë Michael B. Jordan dhe Austin Butler, u ndërprenë të premten në Nju Jork, pas një incidenti me një person të dyshuar se mbante një thikë kasapi.
Sipas Departamentit të Policisë së Nju Jorkut, rreth orës 23:15, një mosmarrëveshje verbale mes një personi aty pranë dhe 23-vjeçarit Alex Perez degjeneroi në nxjerrjen e një thike.
Personi tjetër u ndje i kërcënuar për sigurinë e tij, ndërsa policia mbërriti në vendngjarje dhe arrestoi Perezin. Thika u sekuestrua dhe nuk u raportua për të lënduar.
I riu u akuzua për kërcënim dhe posedim të paligjshëm arme. Nuk është konfirmuar nëse Michael B. Jordan, 39 vjeç, ndodhej në sheshin e xhirimit gjatë incidentit.
Përfaqësuesit e aktorit dhe regjisorit Joseph Kosinski nuk kishin bërë ende asnjë koment lidhur me ngjarjen.
“Miami Vice ’85” është një version i ri i serialit të njohur televiziv të viteve ’80, me protagonistë Don Johnson dhe Philip Michael Thomas.
Në filmin e ri, Butler interpreton detektivin Sonny Crockett, ndërsa Jordan luan Ricardo Tubbs.
Të dy personazhet maskohen si kriminelë për të depërtuar në rrjetet kriminale në jug të Floridës.
Në kastin e filmit përfshihen gjithashtu Walton Goggins, John Leguizamo, Haley Lu Richardson, Camila Morrone, Dominic Sessa dhe Danny Ramirez.
Filmi pritet të shfaqet në kinema më 19 maj 2028, pasi data fillestare e publikimit, gushti i vitit 2027, u shty.