Një grua ka vdekur në Spitalin e Përgjithshëm të Tivarit, në Mal të Zi, pasi dyshohet se u qëllua me armë zjarri nga bashkëshorti i saj, i cili më pas dyshohet se kreu vetëvrasje.
Sipas mediumit malazez “Vijesti”, burri me inicialet Z.S. dyshohet se ka qëlluar me armë zjarri bashkëshorten e tij, D.K., në shtëpinë e tyre në lagjen Bjellisi të Tivarit.
Ngjarja ka ndodhur të martën, më 27 tetor, rreth orës 14:00.
Policia e Malit të Zi ka konfirmuar se zyrtarët policorë, pas marrjes së informatës për të shtëna me armë zjarri, kanë dalë në vendin e ngjarjes, ku e kanë gjetur Z.S. pa shenja jete.
Sipas informacioneve fillestare të policisë, ai dyshohet se ka përdorur një pistoletë për ta qëlluar gruan, e cila kishte marrë plagë kërcënuese për jetën. Më pas, dyshohet se i njëjti armë është përdorur edhe për vetëvrasjen e tij.
Gruaja ishte dërguar nga ekipi i emergjencës në Spitalin e Përgjithshëm të Tivarit, por nuk ka arritur t’u mbijetojë plagëve.
“D.K., e cila pësoi lëndime kërcënuese për jetën në këtë rast, ndërroi jetë nga plagët e marra në Spitalin e Përgjithshëm në Tivar”, thuhet në njoftimin e Drejtorisë së Policisë së Malit të Zi.