Të dielën, një javë pas vrasjes tragjike të Arlinda Zekajt në Vitomiricë të Pejës, është bërë publike një letër tjetër shkruar prej saj, e drejtuar institucioneve të drejtësisë pak para se të humbiste jetën. Kjo letër dëshmon për përpjekjet e saj të dëshpëruara për të gjetur mbrojtje.
Letra, e cila i ishte dërguar gjyqtarit Migjen Kastrati, përmbante një kërkesë urgjente nga Zekaj për caktimin e një urdhri mbrojtës dhe për marrjen e një vendimi lidhur me kujdestarinë e djalit të saj.
Publikimi i saj u bë nga Natyra Kuçi. Në letër, Arlinda i drejtohet gjyqtarit me një apel të fortë për trajtimin e shpejtë të çështjes së saj. Ajo shkruante: “Për ju është rutinë, për mua është jetë dhe veç Zoti e di pse ty të ka zgjedhur të shpëtosh jetë.” Kjo frazë prekëse është pjesë e letrës së shkruar nga Arlinda Zekaj më 7 shtator të këtij viti.
Publikimi i kësaj letre intensifikon reagimet e shumta publike dhe ngre pikëpyetje serioze mbi mënyrën se si institucionet e drejtësisë kanë trajtuar kërkesat dhe denoncimet e vazhdueshme të viktimës për dhunë.
Lidhur me këtë vrasje, janë arrestuar ish-bashkëshorti i saj, Jeton Sylaj, dhe ish-kunati, Albert Sylaj. Të dyve u është caktuar masa e paraburgimit prej një muaji.