Jugoslav Gashiq, kandidat për deputet nga Lista Studentore në Kuvendin e Serbisë, ka deklaruar se nuk do të ketë asnjë bashkëpunim politik me Listën Serbe. Ai theksoi se Lista Studentore e konsideron Listën Serbe si zgjatim të politikës së Partisë Përparimtare Serbe (SNS), e cila, sipas tij, ka vepruar në mënyrë katastrofale në Kosovë.
Gashiq nënvizoi se qëndrimi i Listës Studentore ndaj Listës Serbe është identik me atë që kanë ndaj politikës së Partisë Progresive Serbe të Aleksandar Vuçiqit.
“Lista Serbe veproi si zbatuese e politikave të SNS-së në Kosovë, me rezultate absolutisht katastrofale. Nuk duam asnjë kontakt dhe asnjë bashkëpunim me ta”, theksoi Gashiq për Radio KIM.
Sipas vlerësimit të Gashiqit, rezultatet e fundit zgjedhore përbëjnë një tronditje serioze politike për Listën Serbe. Ai theksoi se përfaqësuesit e saj, në radhë të parë, janë të shqetësuar për të ardhmen e tyre.
“Për ta kjo është një befasi e madhe dhe një tërmet”, citohet të ketë thënë Gashiq, i cili shtoi se përfaqësuesit e Listës Serbe janë aktualisht më të preokupuar me çështjen e së ardhmes së tyre politike dhe personale, sesa me funksionimin e mëtejshëm të partisë.
“Lista Serbe ishte absolutisht e bindur në fitoren e saj, sepse prej vitesh kishte praktikuar veprime të pandershme dhe presione ndaj popullit tonë, duke i shantazhuar që të votonin për opsionin që ata mbështesnin. E humbën ndjenjën e realitetit dhe menduan se në këtë mënyrë do të fitonin me siguri”, përfundoi Gashiq.