Tensionet në rajonin e Gjirit po thellohen pas disa shpërthimeve në Bahrein, për të cilat Irani ka marrë përsipër përgjegjësinë. Sipas deklaratës iraniane, një bazë radari amerikane u shënjestrua.
Shpërthimet u dëgjuan në Bahrein, dhe besohet se janë shkaktuar nga aktiviteti i dronëve. Agjencia e lajmeve AFP raportoi se sirenat kishin rënë dhe autoritetet kishin lëshuar paralajmërime në mediat sociale, duke u bërë thirrje banorëve të kërkonin strehim të sigurt, pa specifikuar natyrën e kërcënimit.
Përmes një mesazhi në platformën X, Ministria e Brendshme e Bahreinit u kërkoi qytetarëve “të qëndrojnë të qetë, të shkojnë në vendin më të afërt të sigurt dhe të ndjekin përditësimet përmes kanaleve zyrtare”.
Përgjegjësinë për sulmin e mori Garda Revolucionare Islamike (IRGC) e Iranit, e cila njoftoi se kishte goditur një bazë ushtarake amerikane. “Sistemi i radarit të mbrojtjes ajrore amerikane në bazën e helikopterëve Al-Riffa në Bahrein u shënjestrua nga gjashtë dronë që i përkisnin forcës hapësinore të Gardës Revolucionare Islamike,” tha IRGC në një deklaratë të postuar në Telegram.
Ndërkohë, zëdhënësi i koalicionit të udhëhequr nga Arabia Saudite, Turki al-Maliki, njoftoi në X se “mbrojtja ajrore kapi dhe shkatërroi dy raketa balistike të lëshuara nga milicia terroriste Houthi drejt Riadit”. Më herët, al-Maliki kishte raportuar se mbrojtja ajrore saudite kishte rrëzuar dy dronë në rajonin lindor të vendit.