**Avokati Jashari ngre pikëpyetje për llogaritjen e paraburgimit të Thaçit pas aktgjykimit të Speciales**
Avokati Arbër Jashari ka komentuar aktgjykimin e dytë të Dhomave të Specializuara të Kosovës në Hagë ndaj ish-presidentit Hashim Thaçi dhe personave të tjerë, për veprat penale kundër administrimit të drejtësisë.
Jashari shprehu shqetësimin se Gjykata nuk e ka bërë të qartë nëse Hashim Thaçit i është llogaritur koha e kaluar në paraburgim në kuadër të dënimit të tij. Ai vuri në dukje se, ndryshe nga rasti i Thaçit, te dy të dënuar të tjerë me nga 12 muaj burgim, gjykata kishte llogaritur kohën e paraburgimit, duke konsideruar dënimin të shlyer.
Jashari e cilësoi procesin ndaj Thaçit dhe të tjerëve si “absurd,” duke argumentuar se ai ishte një përpjekje për të diskredituar ish-presidentin dhe për të justifikuar punën e prokurorisë, sesa një proces i mirëfilltë gjyqësor. Ai ngriti shqetësime për mënyrën e mbikëqyrjes dhe përgjimit të Thaçit, përfshirë edhe kontaktet me ekipin mbrojtës.
Sipas Jasharit, në të dy proceset gjyqësore ndaj ish-krerëve të UÇK-së, si ai për krime lufte ashtu edhe ky për pengim të administrimit të drejtësisë, janë evidentuar shkelje të të drejtave dhe lirive themelore të individëve. Ai theksoi se mënyra se si është përpiluar aktakuza, si janë mbajtur të vëzhguar e të përgjuar, dhe si janë përcjellë kontaktet e tyre (edhe me ekipet mbrojtëse), tregon një qasje të gjykatës në kundërshtim me parimet bazë të drejtësisë.
Në aktgjykimin e shpallur nga gjyqtari Kristofer Gosnell:
* Hashim Thaçi u dënua me 17 muaj burgim.
* Bashkim Smakaj dhe Fadil Fazliu u dënuan me nga 12 muaj burgim.
* Hajredin Kuçi u dënua me një muaj burgim me kusht.
* Ish-kryetari i Malishevës, Isni Kilaj, u shpall i pafajshëm.
