Tottenhami vendos kushte për largimin e Richarlisonit

Tottenham Hotspur është i gatshëm të shesë sulmuesin Richarlison gjatë afatit kalimtar të janarit, por klubi nuk dëshiron që ai të transferohet te ndonjë rival i drejtpërdrejtë në Premierligë.

Sipas raportimeve të “Football Insider”, Evertoni dhe Crystal Palace kanë shprehur interesim për 29-vjeçarin, megjithatë drejtuesit e Tottenhamit preferojnë që ai të largohet drejt një kampionati tjetër.

Richarlison nuk bën më pjesë në planet e trajnerit Ange Postecoglou, i cili e ka lënë jashtë planeve të ekipit për Premierligë. Për këtë arsye, edhe vetë futbollisti është i interesuar të largohet në kërkim të një ambienti të ri ku të ketë më shumë hapësirë për të luajtur.

Interesimi për brazilianin nuk mungon as jashtë Anglisë. Klube nga Turqia dhe Brazili po e ndjekin situatën e tij, ndërsa një transferim jashtë Premierligës shihet si opsioni më i mundshëm.

Tottenhami dëshiron të përfitojë financiarisht nga largimi i tij, por njëkohësisht nuk dëshiron të bëjë gabimin duke përforcuar një kundërshtar në kampionat.

Kontrata e Richarlisonit me Tottenhamin skadon në verën e vitit 2027, gjë që e kthen afatin kalimtar të janarit në një mundësi të rëndësishme për klubin londinez që të përfitojë nga shitja e tij.