Haxhiu: Kjo javë, vendimtare për presidentin; vendi s’duhet të shkojë në zgjedhje
Ushtruesja e detyrës së Presidentes, Albulena Haxhiu, ka theksuar se kjo javë është vendimtare për zgjedhjen e kreut të shtetit, duke theksuar nevojën për konsensus mes partive politike për të shmangur zgjedhjet e parakohshme. Kështu raporton Ekonomia Online.
Haxhiu shprehu shpresën se kjo javë do të fillojë me takime ndërmjet partive politike dhe mirëpriti çdo kontribut për çështjen e zgjedhjes së Presidentit. Ajo shtoi se, megjithëse nuk kanë mbetur shumë ditë, nëse ka vullnet, zgjidhja mund të arrihet brenda pak orësh.
“Prandaj i ftoj edhe sot, këtë të diel, që javën që kemi para nesh ta shfrytëzojmë me takime, të cilat uroj të përmbyllen me një konsensus sa i përket emrit të Presidentit,” tha Haxhiu.
Ajo sqaroi se nuk është përgjegjëse për thirrjen e takimeve, por se ftesat po bëhen nga Kryeministri Albin Kurti, si kryetar partie dhe si drejtues i koalicionit qeverisës me 66 deputetë. Haxhiu theksoi se, nëse partitë presin ftesë prej saj si ushtruese detyre e Presidentes, ajo do t’i ftonte, por nuk ka parë kërkesa të tilla. Ajo u bëri thirrje partive t’u përgjigjen pozitivisht ftesave të Kurtit, për të arritur një marrëveshje për Presidentin e ardhshëm, duke shmangur problemet e së kaluarës.
Ushtruesja e detyrës së Presidentes nënvizoi rëndësinë e shmangies së zgjedhjeve të parakohshme, duke argumentuar se vendi ka shumë punë përpara, si brenda ashtu edhe jashtë kufijve. Ajo kërkoi që të merret parasysh interesi qytetar dhe jo interesat individuale apo grupore.
Sipas Haxhiut, qytetarët nuk dëshirojnë zgjedhje në këtë moment, pasi kanë votuar në dhjetor të vitit të kaluar. “Prandaj mendoj që askush nuk do të duhej të synonte që me veprimet e tyre ta çojnë vendin në zgjedhje. I ftoj që të përbashkohen, të unifikohen, e pastaj betejat për çështje të tjera i lëmë pas zgjedhjes së Presidentit,” përfundoi Haxhiu.