**Prizren: Shoferi ndëshkohet, drejtoi me shpejtësi trefish mbi limitin e lejuar**
Një rast flagrant i tejkalimit të shpejtësisë u regjistrua këtë të hënë në Prizren, duke rezultuar në ndëshkimin e një shoferi.
Sipas njoftimit të Policisë së Kosovës, një i ri kishte postuar në rrjete sociale imazhe duke drejtuar automjetin e tij me shpejtësinë marramendëse prej 178 km/h, në një zonë ku kufizimi i shpejtësisë ishte vetëm 50 km/h.
Pas verifikimeve në bazën e të dhënave policore nga efektivët e Stacionit Policor të Prizrenit, u bë e mundur identifikimi i drejtuesit të automjetit dhe pronarit të tij.
Ndaj personit në fjalë janë marrë masat ligjore të parashikuara, siç ka njoftuar Policia. Këto masa përfshijnë:
* Një gjobë prej 500 euro.
* Heqje e lejes së drejtimit (patentë shoferit) për një periudhë 12-mujore.
* Pesë pikë negative në lejen e drejtimit.