Shqipëria Dënon Ashpër Sulmin Terrorist të Iranit Kundër Emirateve të Bashkuara Arabe
Kryeministri i Shqipërisë, Edi Rama, dënoi ashpër sulmin e Iranit kundër Emirateve të Bashkuara Arabe.
Nëpërmjet një postimi në platformën “X”, Kryeministri Rama theksoi se Shqipëria dënon me fjalët më të ashpra të mundshme këtë sulm, të cilin e cilësoi terrorist. Ai shtoi se sulmi vjen nga një regjim që, sipas tij, vazhdon të eksportojë dhunë, paqëndrueshmëri dhe pasiguri përtej kufijve të tij.
Sipas Ramës, Irani duhet të mbahet plotësisht përgjegjës për këtë përshkallëzim të rrezikshëm.
“Sulmet e ripërtëritura me raketa nga ‘Shteti Terrorist’ i Iranit kundër Emirateve të Bashkuara Arabe vëllazërore janë një akt agresioni i pamatur, i paprovokuar dhe krejtësisht i pajustifikueshëm kundër një kombi sovran dhe kundër vetë paqes rajonale,” shkroi Rama.
Ai vijoi se ky nuk është vetëm një sulm ndaj një vendi të caktuar, por kundër vetë mundësisë së paqes dhe sigurisë në Gjirin Persik dhe shumë më gjerë.
“Solidariteti ynë i plotë është me udhëheqjen, popullin dhe mbrojtësit e Emirateve të Bashkuara Arabe. Ata që kërkojnë të terrorizojnë kombet e lira përmes raketave dhe frikësimit duhet të dinë se akte të tilla vetëm sa thellojnë izolimin e tyre dhe forcojnë vendosmërinë e atyre që qëndrojnë për sovranitet, siguri dhe paqe globale,” përfundoi Rama në postimin e tij në “X”.