Anne Hathaway ka kërkuar falje pas momentit tashmë viral nga premiera e filmit “Verity” në New York, ku ajo shihet duke u dhënë udhëzime fotografëve në tapetin e kuq për mënyrën se si të realizonin fotot.
Aktorja 43-vjeçare, e cila është në pritje të fëmijës së saj të tretë, tërhoqi vëmendjen në rrjetet sociale pasi mori situatën në dorë ndërsa pozonte së bashku me kolegët e saj Dakota Johnson dhe Josh Hartnett.
Fituesja e Oscarit ka pranuar tani se në atë moment kishte kaluar, siç e përshkroi vetë, në “modalitetin e nënës”.
Gjatë paraqitjes së saj në The Tonight Show, moderatori Jimmy Fallon i tha se do të transmetonte videon që kishte bërë xhiron e internetit.
“I di saktësisht se çfarë do të tregosh dhe është e tmerrshme. Është material për makthe”, tha Hathaway, dukshëm në siklet.
Fallon e përshkroi sjelljen e saj si “mom mode”, ndërsa aktorja u pajtua me humor.
“Po përpiqesha vetëm të ndihmoja. Ishim shumë veta, fotografët po fillonin të mërziteshin dhe atmosfera po ndryshonte”, shpjegoi ajo.
Hathaway pranoi se sapo mbaroi me udhëzimet, e kuptoi menjëherë se momenti ishte regjistruar edhe në video.
“Po e bëja sepse po përpiqesha t’ua siguroja foton që donin, por sapo mbarova mendova: ‘Oh jo, ka edhe video!’ Brenda vetes u përkula komplet nga sikleti”, tha ajo.
Më pas aktorja kërkoi falje me shaka.
“U kërkoj falje të gjithëve. Ajo vajzë doli në pah mbrëmë. Në fakt, nuk doli për të luajtur. Doli për punë”, tha Hathaway duke qeshur.
Dakota Johnson gjithashtu bëhet pjesë e momentit viral
Në videon që u shpërnda gjerësisht shihet edhe Dakota Johnson, e cila duket paksa e paduruar teksa Hathaway vazhdon të drejtojë fotografët.
Në një moment, Dakota nis të lëvizë me humor në vend dhe më pas prek me përzemërsi barkun e shtatzënë të Anne Hathaway.
Hathaway dëgjohet duke thënë:
“Mirë, të gjithë gati? Do të fillojmë nga e majta dhe pastaj do të vazhdojmë në atë drejtim.”
Duke treguar me dorë, ajo shton:
“Do të fillojmë këtu dhe më pas do të bëjmë atë që tha Josh.”
Dakota përgjigjet me humor: “Pastaj unë do të largohem.”
Dy aktoret kanë krijuar një raport mjaft të afërt dhe lozonjar gjatë xhirimeve të “Verity”, por edhe gjatë turneut promovues të filmit.
Kimi mes Hathaway dhe Johnson në “Verity”
Filmi përmban disa skena intime mes tre protagonistëve kryesorë, ndërsa një prej momenteve që ka tërhequr më së shumti vëmendje është një puthje mes Anne Hathaway dhe Dakota Johnson, e cila raportohet se ka qenë pjesërisht e improvizuar dhe është përfshirë edhe në trailer.
Duke folur së fundmi për këto skena, Hathaway bëri shaka se ishte “mrekulli që askush nuk u sëmur”, ndërsa Johnson tha se do ta puthte Hathaway “për pjesën tjetër të jetës, po të ishte e mundur”.
Çfarë rrëfen “Verity”?
Në adaptimin e romanit bestseller të Colleen Hoover, Anne Hathaway interpreton shkrimtaren e famshme Verity Crawford.
Dakota Johnson luan Lowen Ashleigh, një shkrimtare në vështirësi financiare, e cila punësohet për të përfunduar librat e mbetur të serisë së suksesshme të Verity-t, pasi kjo e fundit mbetet e paaftë për të punuar pas një aksidenti misterioz.
Josh Hartnett interpreton Jeremy Crawford, bashkëshortin e Verity-t.
Kur Lowen zhvendoset në pronën luksoze të çiftit për të punuar mbi librat, ajo zbulon një dorëshkrim të papërfunduar që mund të ekspozojë sekrete të errëta nga e kaluara e Verity-t dhe Jeremy-t.
Ndërsa vazhdon punën, Lowen përpiqet të kuptojë nëse ajo që ka lexuar është thjesht trillim, apo një paralajmërim shqetësues për natyrën e vërtetë të Verity-t.
Filmi pati një debutim të fuqishëm në SHBA, duke kryesuar box office-in gjatë fundjavës së hapjes me 32.6 milionë dollarë, përpara filmit “Digger” me Tom Cruise. /GazetaExpres/