Pep Guardiola, trajneri i Manchester Cityt, ka bërë të ditur se skuadra e tij nuk do të lejohet të konsumojë as edhe një birrë për të festuar triumfin në Kupën FA.
Pavarësisht se sapo kanë fituar trofeun e dytë të sezonit – Kupën FA kundër Chelseat në “Wembley” – trajneri kërkon përqendrim maksimal, pasi gara për titullin e Premier Ligës ka hyrë në fazën e saj vendimtare.
Manchester City siguroi këtë trofe me një fitore 1-0.
Ndërsa ky triumf shton një tjetër trofe në arkat e klubit, pas Kupës Carabao, Guardiola ishte i shpejtë në mbylljen e çdo diskutimi për festime pas ndeshjes në kryeqytet.
Kur u pyet nëse lojtarëve do t’u lejohej të festonin në Londër pas vërshëllimës së fundit, trajneri katalanas dha një përgjigje të prerë.
“Në shtëpi. As edhe një birrë. Jo, jo, jo – nuk kemi kohë [për të festuar],” u shpreh Guardiola para gazetarëve. Ai shtoi: “Chelsea kishte shtatë ditë për t’u përgatitur për finale; ne kishim vetëm tri ditë, dhe dita e djeshme ishte një makth. Kaluam gjashtë orë rrugë nga qyteti deri këtu. Transporti hekurudhor është paksa problematik në këtë vend. Gjashtë orë!”
Qëndrimi i rreptë i Guardiolës shpjegohet me ritmin e ngjeshur të kalendarit të Premier Ligës.
City aktualisht pozicionohet dy pikë pas liderit Arsenal, me vetëm dy ndeshje të mbetura deri në fund të sezonit.
Presioni është i madh për të mos bërë asnjë hap fals në garën për titull. Manchester City e pret të martën mbrëma një udhëtim në “Vitality Stadium” për t’u përballur me Bournemouth. Nëse Arsenali arrin të fitojë ndaj Burnleyt të hënën, atëherë City do të jetë i detyruar të marrë tri pikë kundër Bournemouthit për të mbajtur garën të hapur deri në ditën e fundit të kampionatit.
Duke pasur parasysh rëndësinë e këtyre ndeshjeve, Guardiola po merr masa të rrepta për gjendjen fizike të lojtarëve, duke insistuar në kthimin e menjëhershëm në Manchester për rikuperim.
Megjithëse birra mbetet e ndaluar për momentin, Guardiola konfirmoi se klubi tashmë ka planifikuar festime zyrtare në fund të sezonit.
Plani është të kombinohen sukseset e ekipeve të meshkujve dhe femrave në një paradë të përbashkët në rrugët e Manchesterit, sapo të përfundojë sezoni. “Pas ndeshjeve të fundit të sezonit, do ta festojmë me ekipin e femrave. Klubi më njoftoi për një paradë në Manchester, pasi duhet të festojmë me të dyja skuadrat,” shpjegoi Guardiola.