Balje: Mungon besimi mes meje dhe Lëvizjes Vetëvendosje, qëndrimet e mia të pandryshuara
Deputetja boshnjake në Kuvendin e Kosovës, Duda Balje, ka deklaruar sot, përpara seancës konstituive të re, se nuk ka pasur asnjë takim me kryeministrin në detyrë, Albin Kurti. Ajo theksoi se qëndrimet e saj politike mbeten të pandryshuara që nga periudha kur Kuvendi ishte funksional, para zgjedhjeve të 7 qershorit.
“Nuk kam pasur takim me Kurtin dhe qëndrimet e mia nuk do t’i ndryshoj,” ka pohuar Balje. “Asgjë nuk ka ndryshuar mes partisë sime dhe Lëvizjes Vetëvendosje, dhe nuk kam asnjë arsye të reagoj brenda Kuvendit, siç kam bërë herën e fundit.”
Lidhur me çështjen e presidentit, Balje sqaroi se ende nuk ka zhvilluar bisedime me asnjë parti politike.
Ajo shtoi: “Për postin e presidentit nuk kemi folur ende me asnjë parti dhe nuk kam informacion se çfarë do të ndodhë. Mes meje dhe Lëvizjes Vetëvendosje nuk ka besim; ata nuk besojnë në mënyrën se si unë punoj, e as unë në mënyrën se si punojnë ata.”
Sa i përket votimit për kryetarin dhe nënkryetarët e Kuvendit, të cilët pritet të zgjidhen sot, deputetja Balje u shpreh se nuk do të marrë pjesë në asnjë votim gjatë seancës së sotme.