**Basha: Rikthehet siguria në rrugën e Slivovës, kërkohet ndërhyrje urgjente e Komunës së Ferizajt për menaxhimin e ujërave**
Ministri në detyrë i Infrastrukturës dhe Transportit, Dimal Basha, ka njoftuar se një segment i dëmtuar i rrugës në fshatin Slivovë të Ferizajt është rehabilituar, duke rikthyer sigurinë për pjesëmarrësit në trafik. Njëkohësisht, ai ka theksuar nevojën për ndërhyrje urgjente nga Komuna e Ferizajt për menaxhimin e ujërave sipërfaqësorë, të cilët shkaktuan dëmtimin.
Përmes një postimi në Facebook, Basha bëri të ditur se dëmtimi i segmentit rrugor ishte pasojë e grumbullimit të ujit buzë rrugës, një situatë që, sipas tij, paraqiste rrezik për sigurinë e qarkullimit. Institucionet përkatëse, pas marrjes së informacionit, ndërhynë menjëherë për të sanuar gjendjen.
“Si pasojë e grumbullimit të ujërave në skaj të rrugës, është dëmtuar një segment i rrugës në Slivovë, duke paraqitur rrezik për sigurinë e pjesëmarrësve në komunikacion. Menjëherë pas pranimit të informatës, hartuam planin e intervenimit dhe sot e sanuam dëmtimin, duke rikthyer qarkullimin e sigurt në këtë pjesë të rrugës”, ka shkruar Basha.
Për të parandaluar dëmtime të reja në të ardhmen, Basha theksoi se është e domosdoshme një ndërhyrje nga Komuna e Ferizajt për mirëmbajtjen dhe funksionalizimin e kanalit kullues përgjatë rrugës.
“Për të parandaluar dëmtime të mëtejshme, është thelbësore që Komuna e Ferizajt të ndërhyjë urgjentisht në hapjen dhe mirëmbajtjen e kanalit për largimin e ujit. Kjo do të mundësojë rrjedhjen normale të tij dhe do të shmangë dëmtimin e mëtejshëm të trupit të rrugës”, ka shtuar ai.
Ministri në detyrë ka falënderuar gjithashtu qytetarët për mirëkuptimin dhe durimin e treguar gjatë kryerjes së punimeve në këtë segment rrugor.
Ndërhyrja e Ministrisë ka rikthyer qarkullimin e sigurt në këtë pjesë të rrugës, ndërsa mbetet të shihet nëse Komuna e Ferizajt do të ndërmarrë hapat e kërkuar për zgjidhjen afatgjatë të problemit me menaxhimin e ujërave sipërfaqësorë.