**Bordi i SHSKUK-së Mbyll Mbledhjet për Media, Thërret në Opinion Ligjor**
Bordi Drejtues i Shërbimit Spitalor Klinik dhe Universitar të Kosovës (SHSKUK) ka njoftuar se mbledhjet e tij do të mbahen me dyer të mbyllura. Ky vendim bazohet në një opinion ligjor të marrë nga Departamenti Ligjor në Ministrinë e Digjitalizimit dhe Administratës Publike (MDAP).
Sipas SHSKUK-së, opinioni ligjor u kërkua për të qartësuar mënyrën e zhvillimit të mbledhjeve të Bordit Drejtues dhe pjesëmarrjen e palëve të treta në procedurat administrative. Departamenti Ligjor i MDAP-së e ka mbështetur opinionin në dispozitat e Ligjit Nr. 05/L-031 për Procedurën e Përgjithshme Administrative, i cili rregullon funksionimin e organeve kolegjiale, transparencën dhe pjesëmarrjen e palëve me interes publik apo kolektiv.
Konkluzioni i opinionit është se mbledhjet e Bordit të SHSKUK-së duhet të zhvillohen me dyer të mbyllura, përveç nëse Ligji për Shëndetësinë përcakton ndryshe.
Bordi Drejtues i SHSKUK-së ka deklaruar se respekton këtë opinion ligjor, por njëkohësisht mbetet i përkushtuar ndaj parimeve të transparencës dhe llogaridhënies. Në përputhje me legjislacionin në fuqi, publiku dhe mediat do të informohen rregullisht për vendimet dhe aktivitetet e Bordit përmes komunikatave zyrtare. Gjithashtu, qasja në dokumente publike do të garantohet sipas procedurave ligjore.
Për të forcuar transparencën, dialogun dhe bashkëpunimin institucional, Bordi Drejtues i SHSKUK-së ka theksuar se në mbledhjet e tij do të ftojë përfaqësues të Odave të Profesionistëve Shëndetësorë, Federatës së Sindikatave të Shëndetësisë së Kosovës, Fakultetit të Mjekësisë, si dhe Shoqatës për Mbrojtjen e të Drejtave të Pacientëve. Edhe pjesëmarrja e këtyre përfaqësuesve do të bëhet në përputhje me legjislacionin në fuqi dhe opinionin ligjor të pranuar nga MDAP.