Qindra fansa të Céline Dion po mblidhen çdo ditë para hotelit të saj në Paris, me shpresën për ta parë qoftë edhe për pak sekonda këngëtaren kanadeze, e cila po përgatitet për rikthimin e shumëpritur në skenë.
Dion do të mbajë një seri koncertesh të gjitha të shitura në kryeqytetin francez, ndërsa fansat kanë nisur të presin me orë të tëra jashtë hotelit ku ajo po qëndron gjatë provave.
Fansat presin deri në 36 orë për ta parë
Noëlla Lamy, 52 vjeçe, e cila e përshkruan veten si një nga fanset më të mëdha të Céline Dion, kishte udhëtuar nga një fshat pranë Amiens në veri të Francës për të qëndruar rreth 36 orë para hotelit.
Ajo kishte vendosur të kalonte edhe natën në trotuar, pa tendë, e veshur me një bluzë me portretin e këngëtares.
“Céline Dion është një simbol i guximit dhe një frymëzim”, tha ajo.
Lamy, e cila punon në sektorin e ushqimit në një klinikë private, e ka parë Dion disa herë në koncerte në SHBA dhe Francë dhe tashmë ka siguruar bileta edhe për një nga shfaqjet e reja në Paris.
Rikthimi pas problemeve serioze shëndetësore
Céline Dion, 58 vjeçe, njoftoi në vitin 2022 se ishte diagnostikuar me sindromën e personit të ngurtë, një çrregullim i rrallë dhe i pashërueshëm autoimun.
Gjendja e detyroi të ndërpriste për një periudhë performancat.
Më vonë ajo tregoi se kishte përjetuar spazma muskulore aq të forta sa i kishin shkaktuar edhe dëmtime në brinjë.
Në dokumentarin e vitit 2024, “I Am: Céline Dion”, këngëtarja tregoi hapur seriozitetin e gjendjes së saj shëndetësore dhe dhimbjet me të cilat ishte përballur.
“Jam shumë e lumtur që po rikthehet në skenë dhe shpresoj që ky rikthim të jetë sa më i butë për të”, tha Lamy.
“E di se ndoshta nuk do të jenë të njëjtat koncerte si më parë për shkak të shëndetit të saj, por jam e bindur se ajo do ta tejkalojë veten dhe gjithçka do të jetë madhështore.”
“Muzika e saj më ndihmoi në momentet më të vështira”
Për shumë fansa, lidhja me Dion shkon përtej muzikës.
Lamy tregoi se humbi bashkëshortin pothuajse në të njëjtën periudhë kur këngëtarja humbi burrin e saj, René Angélil.
“Këngët e saj më ndihmuan shumë. E kam parë për herë të parë në televizionin francez kur ajo ishte 14 vjeçe dhe unë tetë. Që atëherë kam qenë fanse”, tha ajo.
Një lidhje e veçantë me publikun francez
Dion u rrit si më e vogla e 14 fëmijëve në një qytet të vogël pranë Montrealit, në Quebec-un frankofon.
Edhe pse në botë njihet veçanërisht për hitin e vitit 1997 “My Heart Will Go On”, pjesë e filmit “Titanic”, në Francë ajo ka një lidhje të veçantë me publikun për shkak të repertorit të saj të gjerë në gjuhën frënge.
Albumi i saj “D’eux”, i publikuar në vitin 1995, u bë albumi frankofon më i shitur i të gjitha kohërave.
Në vitin 2024, Dion interpretoi një këngë të Edith Piaf nga Kulla Eiffel gjatë ceremonisë së hapjes së Lojërave Olimpike në Paris.
Del rregullisht për të përshëndetur fansat
Gjatë qëndrimit të saj në Paris, Dion ka dalë disa herë para hotelit për të përshëndetur fansat.
Ajo ka biseduar me ta dhe në disa raste edhe ka vallëzuar përpara turmës.
Pak ditë pas mbërritjes, Dion u kishte thënë fansave se nuk po dilte nëpër Paris përveçse për prova.
“Po përpiqem ta ruaj energjinë që të jap më të mirën nga vetja”, u kishte thënë ajo.
Atmosfera para hotelit kthehet në festë
Zona përpara hotelit është shndërruar shpesh në një lloj feste të improvizuar.
Punonjësit e ndërtesave përreth kanë vendosur altoparlantë në ballkone dhe kanë lëshuar hitet e Dion, ndërsa fansat kanë kërcyer në rrugë.
Marina, 31 vjeçe, e cila punon si kimiste në një kompani kozmetike dhe ka bileta për një nga koncertet, tha se vendosi të shkonte te hoteli pikërisht për shkak të atmosferës.
“Nëna ime i kishte të gjitha CD-të e saj kur isha fëmijë dhe unë gjithashtu e kam parë ‘Titanic’ që e vogël. Edhe nëse nuk e dëgjon posaçërisht Céline Dion, në Francë je vazhdimisht i rrethuar nga muzika e saj”, tha ajo.
Sipas Marinës, mënyra e hapur me të cilën Dion ka folur për problemet e saj shëndetësore e ka afruar edhe më shumë me publikun.
“Shumë yje duket sikur mendojnë se nuk duhet të tregojnë kurrë momentet e vështira, por edhe ata janë njerëz si ne. Mendoj se kjo e bëri atë edhe më reale dhe më të afërt me fansat.”
Fanse që nga Eurovisioni i vitit 1988
Sylvie Lugans, një ish-punonjëse kafeneje tashmë në pension, e ndjek Dion që nga viti 1988, kur këngëtarja fitoi Eurovisionin duke përfaqësuar Zvicrën.
“Në skenë është një diva e mrekullueshme, por në jetën reale është shumë e thjeshtë dhe me këmbë në tokë”, tha Lugans.
Edhe Augustin, 21 vjeç, kishte udhëtuar nga veriu i Francës për të qëndruar para hotelit.
Ai arriti ta shihte Dion teksa përshëndeste turmën gjatë largimit për në prova.
“Ka guximin të flasë për momentet më të vështira të jetës së saj dhe kjo është shumë prekëse”, tha ai.
Rikthimi i Céline Dion në skenë pritet me emocion të madh, jo vetëm për shkak të muzikës së saj, por edhe për simbolikën që ka marrë rikthimi pas betejës së gjatë me problemet shëndetësore. /GazetaExpress/