Rada Trajkoviq, kryetare e Lëvizjes Europiane të Serbëve në Kosovë, ka deklaruar për gazetën “Danas” se deklaratat e presidentit të Serbisë, Aleksandar Vuçiq, mbi shqyrtimin e ndryshimit të rrjedhës së lumit Ibër, përbëjnë një strategji për konsum të brendshëm politik. Ajo thekson se Vuçiq është i vetëdijshëm që e drejta për ujë është një e drejtë njerëzore e njohur nga Kombet e Bashkuara dhe se ai nuk do të hynte në një konflikt të tillë me të drejtën ndërkombëtare. Gjithashtu, Trajkoviq kujton se Liqeni i Ujmanit (Gazivodës) furnizon me ujë edhe komunitetin serb në Kosovë.
Trajkoviq e vlerëson këtë deklaratë të Vuçiqit si pasojë e rënies së popullaritetit të tij mes votuesve me orientim patriotik, pikërisht në prag të zgjedhjeve. Ajo shpjegon se presidenti serb, me qëndrimet e tij shpesh kontradiktore, përpiqet të mbulojë të gjithë spektrin ideologjik dhe të synojë votuesit e të gjitha bindjeve politike.
Sipas saj, ndërsa vizita e presidentit Zelensky i dha një rritje të vogël mbështetjeje mes votuesve pro-BE-së, reagimi i dobët i Beogradit ndaj zhvillimeve në Kosovë – veçanërisht ndaj rrënimit të shtëpive dhe objekteve përreth Gazivodës – ka dëmtuar ndjeshëm mbështetjen e tij mes qytetarëve me orientim nacionalist. Prandaj, deklarata aktuale e Vuçiqit duhet parë në këtë kontekst.
Ajo kujton gjithashtu strategjitë e mëparshme të mbijetesës politike të Vuçiqit, të cilat variojnë nga “liqeni i paqes” i Trumpit, përmes qëndrimit “nuk e japim Gazivodën”, e deri te deklarata “do ta zbrazim Gazivodën”.