**Policia e Kosovës Ekstradon të Dyshuarin për Mashtrim nga Zvicra**
Policia e Kosovës ka njoftuar se më 1 prill 2026, ka realizuar ekstradimin e shtetasit B.Z. nga Zvicra në Kosovë. Personi në fjalë ishte në kërkim ndërkombëtar nën dyshimin për kryerjen e veprës penale të mashtrimit.
Sipas njoftimit të Policisë së Kosovës, ekstradimi u bë i mundur nga njësitet e Drejtorisë për Bashkëpunim Ndërkombëtar Policor, në koordinim të plotë me institucionet relevante vendore dhe ato të drejtësisë.
I dyshuari B.Z. ishte arrestuar paraprakisht nga autoritetet zvicerane, pasi kërkohej përmes Interpolit me një urdhër arresti ndërkombëtar, të lëshuar nga institucionet e drejtësisë së Kosovës. Ai dyshohet se i ishte shmangur drejtësisë për veprën penale “Mashtrim”.
Policia thekson se ekstradimi u realizua bazuar në ligjet në fuqi dhe si rezultat i bashkëpunimit të ngushtë ndërinstitucional mes Republikës së Kosovës dhe autoriteteve zvicerane.
Në fund, Policia e Kosovës ka ritheksuar angazhimin e saj për të vazhduar shkëmbimin e informacioneve dhe bashkëpunimin me institucionet vendore, shtetet dhe organizatat ndërkombëtare. Qëllimi kryesor është parandalimi, hetimi dhe zbulimi i aktiviteteve kriminale, si dhe gjurmimi, kapja dhe arrestimi i personave e grupeve kriminale që veprojnë brenda dhe jashtë vendit.