Ish-mesfushori i Watfordit, Pierre Dwomoh, është dënuar me 11 ndeshje pezullim nga Federata Angleze (FA) për abuzim racist ndaj njërit prej bashkëlojtarëve të tij.
Dwomoh, i cili u lirua nga klubi i Championshipit më herët këtë muaj, u shpall fajtor për një shkelje “shumë serioze” dhe “plotësisht të papranueshme” nga një komision i pavarur.
Dënimi lidhet me abuzimin verbal ndaj një lojtari të ekipit U21 me origjinë indiane – i identifikuar si “Lojtari A” – në dy raste të ndara gjatë tetorit dhe nëntorit të vitit të kaluar.
Komisioni deklaroi se Dwomoh “nuk e pranoi menjëherë përgjegjësinë dhe nuk tregoi pendim, por u përpoq të ushtronte presion mbi Lojtarin A që të tërhiqte ankesën”.
Belgu 22-vjeçar më vonë pranoi fajësinë për të dyja akuzat, kërkoi falje për veprimet e tij dhe mori përgjegjësinë për to.
Pezullimi prej 11 ndeshjesh është llogaritur me efekt prapaveprues që nga prilli i vitit 2026.
Ngjarjet ndodhën gjatë nxehjeve para ndeshjeve të ekipit U21 kundër Swansea City më 27 tetor 2025 dhe Colchester United më 4 nëntor 2025, të zhvilluara në qendrën stërvitore të Watfordit në London Colney.
Dwomoh deklaroi se bisedat kishin nisur “si shaka” dhe se ai nuk kishte pasur qëllim të ofendonte apo të përdorte gjuhë raciste.
Në intervistën e tij me FA-në, ai tha se nuk ishte nga Anglia dhe se, në kulturën e tij, “kemi shumë prejardhje të ndryshme. Shumë të ndryshme. Kemi afrikanë, indianë, pakistanezë, kemi gjithçka.”
Ai pretendoi gjithashtu se nuk e kishte kuptuar se komentet e tij do ta ofendonin Lojtarin A, duke shtuar se e dashura e tij ishte gjithashtu britaniko-indiane dhe se kishte bërë shaka me të për ngjyrën e lëkurës.
Sipas dëshmisë, para ndeshjes kundër Swanseat, Dwomoh i kishte thënë Lojtarit A: “A je i zi si unë apo je me lëkurë të çelët?”
Lojtari A ishte përgjigjur: “Jam kafe.”
Pas kësaj, Dwomoh kishte thënë: “Kafja nuk është ngjyrë.”
Sipas tij, Lojtari A kishte qeshur me komentin. Ai deklaroi se menjëherë para këtyre komenteve po zhvillohej një bisedë për ngjyrën e lëkurës.
Dwomoh shtoi se nuk ishte i sigurt nëse Lojtari A po qeshte “nga sikleti apo sepse e pa si shaka”, por këmbënguli se komenti ishte menduar “më shumë si një pyetje me humor”.
Lojtari mohoi gjithashtu se kishte thënë “Aziatikët janë të verdhë” dhe deklaroi se nuk bënte shaka që “kalonin kufijtë”.
Gjatë intervistës, ai përsëriti: “Mendoj se njerëzit ngjyrë kafe nuk ekzistojnë. Je ose me lëkurë të çelët ose i zi…”
Para ndeshjes kundër Colchester United, sipas raportit, Dwomoh e kishte pyetur Lojtarin A: “Si po shkon dyqani yt i qoshes?”
Në intervistën me FA-në, ai deklaroi se “tani e kuptonte se ky koment ishte ofendues, por më parë nuk e kishte kuptuar këtë, përndryshe nuk do ta kishte bërë”.
Raporti shton: “Lojtari mohoi se kishte thënë ‘Rruajani kokën’. Megjithatë, ai pranoi se kishte thënë në frëngjisht ‘Arrête de jouer à la victime’, që do të thotë ‘Mos luaj rolin e viktimës’.”
Ai deklaroi vazhdimisht se nëse Lojtari A i kishte marrë komentet personalisht, duhej t’i ishte drejtuar drejtpërdrejt atij.
Sipas raportit, Dwomoh mendonte se situata ishte bërë shumë më e madhe sesa ishte menduar fillimisht dhe se Lojtari A po përfitonte nga situata në kurriz të tij.
Përveç pezullimit prej 11 ndeshjesh, Dwomoh është urdhëruar të paguajë edhe një gjobë prej 2,500 paundësh.
Ai gjithashtu do të duhet të ndjekë detyrimisht një program edukativ ballë për ballë deri më 9 gusht 2026./GazetaExpress/