Granit Xhaka mbështet Noah Okaforin në vendimin e tij
Noah Okafor ka njoftuar tërheqjen e tij nga Kombëtarja e Zvicrës për sa kohë që Murat Yakin do të mbetet trajner. Sulmuesi 26-vjeçar e bëri publik vendimin përmes një postimi në Instagram, ku theksoi mungesën e besimit dhe trajtimin e padrejtë nga stafi teknik.
Okafor nënvizoi se vendimi i tij nuk lidhet me minutat e luajtura, por me marrëdhënien që ka me trajnerin. Ai nuk e ka përjashtuar një rikthim në të ardhmen, por ka pohuar qartë se nuk dëshiron të luajë për Zvicrën nën drejtimin e Yakin.
Postimi i tij mori mbështetje të konsiderueshme nga kapiteni i Zvicrës, Granit Xhaka, i cili komentoi me një ikonë zemre të kuqe. Edhe Nico Elvedi reagoi në të njëjtën mënyrë, ndërsa disa ish-bashkëlojtarë të Okaforit, përfshirë Ruben Vargas, Ricardo Rodriguez, Johan Manzambi dhe Denis Zakaria, shprehën pëlqimin e tyre për postimin.
Reagimet e Xhakës dhe Elvedit nuk e sqarojnë nëse bëhet fjalë vetëm për mbështetje personale ndaj Okaforit apo edhe për qëndrimin e tij kundër Yakin, por postimi ka shkaktuar reagime të shumta në mjedisin e futbollit zviceran.