Ekspertja e gjuhësisë forenzike, Helen Fraser, dëshmoi të hënën në Gjykatën Speciale në Hagë, në kuadër të gjykimit ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit. Ata akuzohen për vepra penale kundër administrimit të drejtësisë.
Fraser, e cila është studiuese e gjuhësisë forenzike dhe punon në Universitetin e Melburnit në Australi, deklaroi se ka rreth 23 vjet përvojë në fushën e transkripteve forenzike.
Mbrojtësja e Thaçit, Sophie Menegon, vijoi me pyetjet ndaj dëshmitares. Fraser konfirmoi se ka hartuar raportin e 27 marsit 2026. Ajo theksoi se si eksperte ka ofruar ekspertiza gjyqësore në çështje penale, kryesisht në Australi, duke përmendur rreth 100 raste gjyqësore. Dëshmitarja shtoi se ka dëshmuar disa herë në gjykatë dhe se përfundimet e saj janë pranuar nga gjyqësori.
**Historiku i Procesit Gjyqësor**
Në seancën fillestare të 27 shkurtit 2026, Thaçi, Smakaj, Fazliu, Kilaj dhe Kuçi u deklaruan të pafajshëm për akuzat. Po në atë datë filloi dëshminë edhe dëshmitari i parë (me masa mbrojtëse), dëshmia e të cilit përfundoi më 2 mars 2026. Më 3 dhe 4 mars 2026 dëshmoi Koen Herlaar, ekspert i kriminalistikës, ndërsa më 4 mars nisi dëshminë Chrisopher Kelly, hetues i forenzikës digjitale, i cili e mbylli dëshminë më 5 mars.
Hashim Thaçi ndodhet në Qendrën e Paraburgimit në Hagë që nga nëntori i vitit 2020, ku po gjykohet edhe për krime lufte dhe krime kundër njerëzimit. Aktakuza për pengim të administrimit të drejtësisë, objekti i këtij gjykimi aktual, ndaj tij dhe të tjerëve u ngrit në vitin 2024.
Për këtë rast, Bashkim Smakaj, Fadil Fazliu dhe Isni Kilaj u arrestuan në Kosovë më 5 dhjetor 2024 dhe u transferuan në objektin e paraburgimit të Dhomave të Specializuara të Kosovës (DhSK) më 6 dhjetor 2024. Thaçit iu dorëzua fletarrestimi në Hagë po më 5 dhjetor 2024. Hajredin Kuçit iu dorëzua aktakuza e konfirmuar dhe fletëthirrja për paraqitjen e parë gjyqësore më 9 dhjetor 2024.
**Akuzat e Ngritura**
Sipas aktakuzës, Thaçi, individualisht dhe në bashkëpunim me “Grupin Fazliu” (Fadil Fazliu dhe Fahri Fazliu), “Grupin Smakaj” (Bashkim Smakaj, Blerim Shala dhe Artan Behrami) dhe “Grupin Kilaj” (Isni Kilaj dhe Vllaznim Kryeziu), ka vepruar me qëllim pengimi të personave zyrtarë në kryerjen e detyrave.
Akuzat theksojnë se Thaçi udhëhoqi dhe mori pjesë në këto veprime gjatë vizitave të tij në objektet e paraburgimit, ndërsa ishte i ndaluar për gjykimin e krimeve të luftës. Anëtarët e këtyre grupeve u koordinuan për të ndikuar te dëshmitarët e Zyrës së Prokurorit të Specializuar (ZPS) gjatë vizitave të paautorizuara më 2 korrik, 9 shtator dhe 6 tetor 2023.
Si pasojë, Thaçi akuzohet për tre vepra penale të pengimit të personave zyrtarë, tre për shkelje të fshehtësisë së procedurës dhe katër për mosbindje ndaj gjykatës. Kilaj, Smakaj dhe Fazliu akuzohen për tentativë pengimi të personave zyrtarë dhe mosbindje ndaj gjykatës, ndërsa Kuçi për dy akuza mosbindjeje ndaj gjykatës.