**Inspektorati i Punës digjitalizohet plotësisht nga 1 shtatori, do të përdoren edhe dronët**
Prishtinë – Ministri në detyrë i Punës, Andin Hoti, ka njoftuar se nga data 1 shtator, Inspektorati Qendror i Punës do të kalojë plotësisht në inspektime digjitale. Ky vendim, i bërë publik përmes një postimi në profilin e tij në Facebook, synon të modernizojë proceset inspektuese.
Hoti ka theksuar se digjitalizimi do të mundësojë dokumentim në kohë reale, rritje të transparencës dhe llogaridhënies, si dhe monitorim më efikas të punës në terren.
Përveç kësaj, ministri bëri të ditur se njëkohësisht do të nisë edhe përdorimi i teknologjisë së dronëve. Këta të fundit do të shërbejnë si mjete mbështetëse për inspektimin e kantiereve dhe vendeve të punës me rrezik të shtuar, gjithmonë në përputhje me legjislacionin në fuqi.
Në postimin e tij, Hoti përmendi gjithashtu iniciativën për forcimin e koordinimit ndërinstitucional. Qëllimi është që institucionet përgjegjëse të shkëmbejnë informacionin në kohë reale, duke e bërë mbikëqyrjen më parandaluese dhe jo vetëm reaguese.