Inspektorati i Punës Paralajmëron: Procedura Penale për Shkeljen e Ndalimeve në Ndërtim
Inspektorati Qendror i Punës (IQP) u ka bërë thirrje kompanive të ndërtimit dhe investitorëve që të respektojnë vendimet për ndalim të punimeve në kantieret ku janë konstatuar shkelje gjatë inspektimeve të fundit. Ky institucion paralajmëron se çdo shkelje e këtyre vendimeve do të shoqërohet me nisjen e procedurave penale, përveç atyre kundërvajtëse.
Nëpërmjet një njoftimi zyrtar, IQP thekson se nuk duhet të ndërmerren veprime ndërtimore dhe as të hiqen shiritat bllokues deri në përmbushjen e plotë të të gjitha kërkesave ligjore të vendosura nga inspektorët e punës.
Sipas Inspektoratit, çdo veprim në kundërshtim me këto vendime përbën shkelje të rregullave të sigurisë dhe shëndetit në punë (SSHP), si dhe bie ndesh me nenin 358 të Kodit Penal të Republikës së Kosovës. Ky nen trajton asgjësimin, dëmtimin ose heqjen e pajisjeve mbrojtëse dhe rrezikimin e sigurisë në vendin e punës. Autoritetet bëjnë me dije se ndaj shkelësve do të nisin procedura penale në bashkëpunim me Prokurorin e Shtetit.
IQP nënvizon se rregullat e SSHP-së nuk janë thjesht një dëshirë, por një detyrim ligjor dhe njerëzor, me qëllim mbrojtjen e jetës së punëtorëve dhe shmangien e kostove që vijnë nga aksidentet. Prandaj, Inspektorati Qendror i Punës kërkon nga të gjithë punëdhënësit dhe investitorët bashkëpunim të plotë me inspektorët, respektim të vendimeve për ndalim të procesit të punës dhe ndërmarrjen e masave konkrete për ngritjen e nivelit të sigurisë dhe shëndetit në kantieret e tyre ndërtimore.