Kimmich komenton atmosferën në “Bernabéu”: Tifozët janë vërtet të veçantë
Ylli i Bayern Munichut, Joshua Kimmich, ka theksuar se skuadra e tij duhet të diktojë ritmin e lojës për të arritur një rezultat pozitiv ndaj Real Madridit në takimin e së martës.
Në konferencën për shtyp para çerekfinales së parë të Ligës së Kampionëve, Kimmich deklaroi: “Synimi ynë është të lëmë shenjën tonë në çdo ndeshje. Real Madridi ka një stil unik dhe mund të jetë i rrezikshëm në çdo situatë. Do të jetë thelbësore të shfrytëzojmë pikat tona të forta në fushë, ndërsa natyrisht do të përshtatemi deri diku me stilin e tyre”.
Lidhur me përballjen e fundit me “Los Blancos”, Kimmich u shpreh se këtë vit do të performojnë më mirë.
“Pas ndeshjes së parë mendova se mund të kishim fituar me një diferencë më të madhe; në të dytën, Real Madridi ishte qartësisht më i mirë, por më pas Alphonso Davies na vendosi në avantazh me një gol fantastik. Edhe pse rezultati nuk ishte i favorshëm, ne besonim se mund të kishim bërë më mirë. Megjithatë, këtë vit nuk kemi lojtarë të dëmtuar, gjë që ka qenë një problem i vazhdueshëm në vizitat tona të mëparshme. Jemi shumë të lumtur që të gjithë janë në formë”, shtoi ai.
Lidhur me atmosferën në “Bernabéu”, Kimmich theksoi: “Atmosfera dhe tifozët këtu janë tejet të veçantë. Kemi ardhur shumë herë me synime të mira, por jemi larguar të zhgënjyer. Këtë herë, ndeshja e kthimit do të luhet në Mynih, dhe kjo përbën një avantazh për ne”.
Kimmich theksoi gjithashtu rëndësinë e Harry Kane për ekipin.
“Ai është jashtëzakonisht i rëndësishëm për ne. Nuk është vetëm një golashënues i shkëlqyer, por edhe një lider dhe shembull për të tjerët. Ai ka një mentalitet të pazakontë për një sulmues. Është thelbësore që ai të jetë në fushë nesër”, u shpreh ai.
Ai komentoi edhe ndeshjet e Real Madridit kundër Manchester Cityt.
“Nuk i kam parë ndeshjet, por ky është Real Madridi, ku situatat shpesh marrin rrjedhë të ndryshme. Ndoshta prisnim që City të dominonte, por ishte interesante të shihje kualifikimin e Realit. Ata janë përballur shpesh dhe Reali është kualifikuar disa herë edhe kur nuk dukej i merituar, por këtë herë kualifikimi i tyre ishte plotësisht i merituar”, vazhdoi Kimmich.
Lidhur me sekretin e fitores ndaj Real Madridit, ai theksoi: “Për të mposhtur Real Madridin, duhet të jesh në nivelin maksimal, si mentalisht ashtu edhe taktikisht. Të gjithë jemi të emocionuar që do të luajmë këtu. Ky është niveli më i lartë i garës, për të cilin çdo lojtar ëndërron”.
Në fund, ai foli edhe për Kylian Mbappen.
“Ai mund të ndihmojë çdo ekip, sepse zotëron cilësi individuale të jashtëzakonshme dhe është kapiten i Francës. Ka vendosur fatin e shumë ndeshjeve këtë sezon, edhe kur Real Madridi ka kaluar momente të vështira. Është një armë vdekjeprurëse; kam luajtur disa herë kundër tij dhe e dimë se çfarë të presim”, e mbylli Kimmich.