Një konflikt i vjetër për pronësinë e një toke në Kosovë ka degjeneruar në një përleshje të dhunshme me çekan dhe shufra metalike në Zvicër, duke sjellë ndërhyrjen e policisë, përdorimin e pistoletës me elektroshok dhe lëndimin e disa personave. Ngjarja, e cila ndodhi në qytetin e Schlierenit pranë Zürichut, ka sjellë pasoja ligjore për personat e përfshirë.
Sipas mediave zvicerane, një 59-vjeçar me origjinë nga Kosova, banues në rajonin Aarau-Lenzburg dhe me pension invaliditeti, prej kohësh kishte një mosmarrëveshje pronësie me një familje tjetër, gjithashtu me origjinë nga Kosova, e cila jetonte në Zvicër.
Aktakuza thekson se 59-vjeçari vendosi ta zgjidhte këtë çështje “sipas zakonit të vjetër” dhe, pasi gjeti adresën e familjes kundërshtare përmes një restoranti lokal, shkoi në shtëpinë e tyre në Schlieren për një përballje të drejtpërdrejtë.
Situata u përshkallëzua shpejt. I dyshuari thuhet se kërcënoi një grua të familjes, e cila nga frika i thirri dy djemtë e saj për ndihmë. Kur njëri prej djemve doli jashtë për të sqaruar gjendjen, 59-vjeçari liroi qenin nga litari dhe tentoi ta sulmonte atë.
Përleshja fizike që pasoi shpejt u bë më e dhunshme. Sipas dëshmive, 59-vjeçari mori nga automjeti i tij një çekan dhe një shufër metalike, të cilat i përdori për të goditur pjesëtarë të familjes kundërshtare.
Konflikti vijoi me goditje nga të dyja palët derisa në vendngjarje arriti policia. Edhe pas ndërhyrjes së autoriteteve, 59-vjeçari refuzoi të qetësohej dhe u rezistoi efektivëve gjatë tentativës për arrestim. Për shkak të sjelljes së tij agresive, policët u detyruan të përdornin pistoletën me elektroshok për ta neutralizuar. Si pasojë e përleshjes, 59-vjeçari dhe një 25-vjeçar i familjes kundërshtare përfunduan në spital me lëndime të rënda.
Prokuroria e Zürichut i shqiptoi 59-vjeçarit një dënim me gjobë me kusht prej 180 ditësh, së bashku me 1 mijë franga shpenzime gjyqësore. Akuzat përfshinin kërcënimin, pjesëmarrjen në përleshje dhe rezistencën ndaj policisë. Edhe 25-vjeçari nga familja tjetër u dënua me gjobë me kusht për përfshirjen e tij në konflikt, ndërsa rasti i vëllait të tij të mitur po trajtohet në gjykatën për të mitur.
Ky rast thekson se si mosmarrëveshjet pronësore, të nisura në Kosovë, mund të shndërrohen në konflikte serioze me pasoja ligjore dhe penale edhe jashtë kufijve, siç ndodhi në Zvicër.