Kryeministri i Pakistanit, Shehbaz Sharif, u ka bërë thirrje “të gjitha palëve të tregojnë përmbajtje dhe t’i japin paqes edhe një shans” pas shkëmbimit të sulmeve mes Izraelit dhe Iranit, në përshkallëzimin më të rëndë që nga armëpushimi i prillit, raporton CNN.
“Përshkallëzimi i fundit i dhunës në Lindjen e Mesme është një kujtesë e qartë e rreziqeve që lidhen me një armëpushim të brishtë dhe pasojat e rënda që mund të rezultojnë prej tij,” shkroi Sharif në platformën X.
Islamabadi është shfaqur muajt e fundit si një ndërmjetës kyç mes Shteteve të Bashkuara dhe Iranit gjatë konfliktit në Lindjen e Mesme, duke luajtur një rol udhëheqës në negociatat për armëpushimin e përkohshëm të prillit. Duke iu referuar bisedimeve të fundit midis Uashingtonit dhe Teheranit, që synojnë ta shndërrojnë atë armëpushim në një paqe të qëndrueshme, Sharif deklaroi se “objektivi përfundimtar është pothuajse afër arritjes”.
“Ndërsa po punojmë me sinqeritet dhe përkushtim të madh, së bashku me aleatët dhe partnerët tanë, për të gjetur një zgjidhje paqësore diplomatike për konfliktin – dhe veçanërisht kur qëllimi final është pothuajse arritur – ne u bëjmë thirrje sinqerisht të gjitha palëve të tregojnë përmbajtje dhe t’i japin paqes edhe një shans,” theksoi ai.
Kryeministri theksoi gjithashtu në platformën X se diplomacia ende “ofron perspektiva suksesi në vend të dhunës dhe shkatërrimit”.