Zana Avdiu: Albin Kurti nuk është më afër qytetarëve, pengohet nga rojet e tij; Bashkimi i Vjosa Osmanit sjell entuziazëm tek LDK
Zana Avdiu ka ofruar komente të detajuara lidhur me fushatën elektorale të partive për zgjedhjet e 7 qershorit, duke theksuar se Albin Kurti, dikur i afërt me qytetarët, tani është i bllokuar nga rojet e tij. Ajo shtoi se tek Lidhja Demokratike e Kosovës (LDK) ka grupe të organizuara dhe se bashkimi i Vjosa Osmanit me këtë parti sjell entuziazëm të shtuar.
E ftuar në emisionin “Pressing” në T7, Avdiu, duke analizuar tubimet e Lëvizjes Vetëvendosje (VV), u shpreh se lideri i kësaj partie, Albin Kurti, nuk është më i afërt me qytetarët dhe se ai pengohet nga rojet e tij.
Avdiu detajoi më tej: “Tubimet nuk janë siç paraqiten në rrjetet sociale; nëse i ndjek drejtpërdrejt, vëren hapësira të mëdha në vendet ku organizohen. Po të nisim nga VV-ja, tubimi nuk ishte shumë i madh apo i zgjeruar, por i përbërë kryesisht nga strukturat, militantët, aktivistët, kandidatët dhe familjarët, jo nga të gjithë kandidatët. Nëse shihni videot, edhe gjatë kohës që fliste Albin Kurti, ka pasur largim të konsiderueshëm të qytetarëve. Kurti në të gjitha tubimet mbërrin me vonesë, nga 30 minuta deri në 1 orë e gjysmë. Ai është shumë larg qytetarëve; Albin Kurti nuk është më i afërt me ta. Ai shfaqet me një përcjellje të zgjeruar, deri në pesë automjete. Sot vërehet një bllokim nga rojet dhe zyrtarët që e shoqërojnë.”
Duke iu referuar LDK-së, Avdiu shtoi: “Edhe tek LDK, ata po përpiqen të organizojnë tubime të mëdha, të ngjashme me ato të VV-së. Janë grupe të organizuara, kryesisht struktura partiake. Gjithashtu, ajo që shton entuziazëm tek LDK është bashkimi i Vjosa Osmanit me këtë parti, gjë që sjell njëfarë ndryshimi në fushatë,” ka deklaruar ajo, ndër të tjera, sipas raportimit të Gazeta Express.