Liverpooli po rivalizon Manchester Unitedin në garën për transferimin e njërit prej lojtarëve kryesorë të Barcelonës së Hansi Flickut, para hapjes së afatit kalimtar të janarit.
Andoni Iraola investoi shumë gjatë verës, duke transferuar ndër të tjera sulmuesin e Paris Saint-Germainit, Bradley Barcola, për 123 milionë funte, por disa pozita vazhduan të mbeteshin të neglizhuara.
Për shembull, hera e fundit kur Liverpooli transferoi një mesfushor qendror ishte vera e vitit 2023, kur Dominik Szoboszlai, Ryan Gravenberch, Alexis Mac Allister dhe Wataru Endo iu bashkuan skuadrës në “Anfield”.
Liverpooli synon t’i japë fund kësaj periudhe pa përforcime në mesfushë në janar, duke transferuar një mesfushor të ri, dhe aktualisht është në pozitë të favorshme për të siguruar shërbimet e yllit të Bournemouthit, Alex Scott.
Scott, vlera e të cilit llogaritet në plot 100 milionë funte, do të përbënte një investim të rëndësishëm për mesfushën e Iraolas, por anglezi nuk është lojtari i vetëm dhe as pozita e vetme që klubi synon ta përforcojë.
Liverpooli është përballur me probleme të shumta në krahun e djathtë të mbrojtjes që kur Trent Alexander-Arnold iu bashkua Real Madridit në vitin 2025.
Aktualisht, Iraola preferon ta aktivizojë Ronald Araujon si mbrojtës të djathtë klasik, në vend që të përdorë Jeremie Frimpongun, i cili ka hasur vështirësi që nga transferimi në Premierligë nga Bayer Leverkuseni.
Araujo po e mbulon krahun e djathtë të mbrojtjes deri në rikthimin e Conor Bradleyt nga lëndimi afatgjatë, por duket se Liverpooli po planifikon gjithashtu një lëvizje ambicioze në janar për Jules Kounden e Barcelonës.
Sipas informacioneve ekskluzive të mediumit 4-4-2, Liverpooli ka vendosur kontakte me mbrojtësin përmes ndërmjetësuesve, pasi ka mësuar se këtë sezon ai nuk e ka më të garantuar vendin e titullarit te Barcelona.
Francezi ka luajtur mesatarisht vetëm 52 minuta për ndeshje në La Liga këtë sezon, duke i ndarë minutat në krahun e djathtë të mbrojtjes me ish-mbrojtësin e Manchester Cityt, Eric Garcia.
Duke pasur parasysh statusin e tij si njëri prej mbrojtësve më të mirë në futbollin evropian, nuk është për t’u habitur që Liverpooli nuk është klubi i vetëm që po e përcjell situatën e tij.
Bayern Munichu ka shprehur “interesim të madh” për 27-vjeçarin, ndërsa Chelsea, Manchester Unitedi dhe Arsenali janë informuar se Kounde “nuk e përjashton” mundësinë e një transferimi gjatë afatit kalimtar të dimrit.
Francezi, i cili ka regjistruar 58 paraqitje me kombëtaren e Francës, mund të luajë si në qendër të mbrojtjes, ashtu edhe në krahun e djathtë. Ai ka edhe katër vjet kontratë me Barcelonën, ndërsa raportimi pretendon se klubi katalunas do të kërkonte të paktën 60 milionë euro, ose 50 milionë funte, për kartonin e tij.
Kounde aktualisht po e shqyrton me kujdes të ardhmen e tij dhe mund të preferojë të ketë një vend të garantuar në formacionin e një tjetër klubi të madh evropian, në vend që të jetë pjesë e rotacionit të shpeshtë të Flickut.
Garcia është zgjedhja e parë e trajnerit gjerman në krahun e djathtë të mbrojtjes, por kjo nuk do të thotë se ish-lojtari i Sevillas nuk vlerësohet lart. Së fundmi, Flick e ka lavdëruar atë për profesionalizmin e tij.
“Jules Kounde është një lojtar 100 për qind profesionist. Një person 100 për qind profesionist”, tha Flick.
“E shoh këtë çdo ditë. Ai gjithmonë dëshiron të garojë dhe të përmirësohet gjithnjë e më shumë. Ne gjithmonë mendojmë se kush është më i miri në këtë moment, për këtë ndeshje… por ndonjëherë ai duhet ta pranojë se mund ta nisë ndeshjen nga stoli”, shtoi ai.
“Kjo është cilësia e kësaj skuadre. Kemi shumë lojtarë në nivel vërtet të lartë dhe me cilësi të mira”, e mbylli ai.
Është e qartë se trajneri i Barcelonës e konsideron Kounden një pjesëtar të pazëvendësueshëm të skuadrës, por me mundësinë për t’u transferuar në Premierligë në janar, francezi mund të tundohet nga ideja për të nisur një aventurë të re./GazetaExpress/